Маңғыстау облысының «Жанартау» жастар шығармашылығы қоғамдық бірлестігінің белсенділері «Шетелде тұратын қазақ диаспорасымен әлеуметтік және мәдени байланыстарды дамыту» жобасы аясында Түркиядағы қандастармен кездесті.
Басты мақсат – атамекеннен алыста жүрген қаракөз бауырлардың тыныс-тіршілігімен етене танысып, ел Тәуелсіздігінің 25 жылдығын атап өткелі жатқан қазақ елінің жетістіктерін паш ету. Сондай-ақ бірлестік мүшелері дарынды жастарды анықтап, олардың шығармашылығын дамытуға ықпал етуді көздейді. Осыған дейін Ресей мен Әзірбайжан қазақтарымен кездескен маңғыстаулық ұжым түрік елінен соң Иран және Өзбекстандағы қандастардың қал-жағдайын біліп қайтуды жоспарлап отыр.
Анар Шамшадинова, «Жанартау» қоғамдық бірлестігінің төрайымы:
- Қазақ-түрік қорымен әріптестік меморандумына қол қойылды. Осы меморандумның аясында бұл қордың бізге айтқан талап-тілегін тыңдадым. Түркияда балаларды оқытатын қазақ тіліндегі латын кітаптары жоқ. Сондықтан латын тіліндегі қазақ оқулықтары керек екендігін түсіндім. Сондай-ақ қазақтың дәстүрін, өлеңін, әнін сақтап, насихаттап жүрген жастарды жоба аясында фестиваль, конференциялар ұйымдастыратын болсақ, Түркиядағы бауырларымызды шақыратын болдық.