Алматыда жоғалып кеткен 18 жастағы қызды ұрлап кетуі мүмкін

Алматыда медициналық университет талапкері 18 жастағы Назерке Әріп жоғалып кеткенін хабарлаған болатынбыз. Ол соңғы рет «Достық плаза» сауда үйі маңынан көрінген деп жазады Қазақпарат. Қыздың ата-анасы оны ұрлап кеткен болуы мүмкін деп отыр.

Назерке Әріп Талғар ауданы Тұздыбастау ауылында тұрады. Жоғалған күні ол ағылшын тілі бойынша курсқа қатысу үшін үйінен сағат 16:00-де шығып кеткен. Келесі күні полицейлер оның ұялы байланыс телефоны арқылы соңғы болған орнын анықтаған.

«Телефон нөмірін бақылау арқылы оның соңғы рет 10 шілде күні Гурилева-Татибекова-Рысқұлова-Айша бибі көшелері маңында болғаны анықталды. Меніңше, Назерке таксимен жететін жеріне жете алмай қалған», - деді қыздың әкесі.

Қыздың ата-анасы оның жоғалғаны туралы полицияға арызданған.

«Ата-анасының арызы бойынша іс қозғалды. Медеу ауданы ІІБ қызметкерлері іздеу жұмыстарын жүргізіп жатыр», - деді қалалық ІІД ресми өкілі Салтанат Әзірбек. Назеркенің ата-анасы жұртшылықтан көмек сұрап, көрген-білгендер болса хабарласуларын өтінеді.

«Егер Назерке жайлы қандай да ақпарат білсеңіздер 87027516977, 87754820550, 87753655301 телефон нөмірлеріне хабарласуларыңызды сұраймыз», - деп жазды ағайындары.