Алматыда жасөспірімдер арасындағы қылмыс саны азайып келеді

Таяуда Алматы қаласы Бостандық ауданындағы №146 мектеп-лицейде аудандық кәмелетке толмағандар ісі және олардың құқығын қорғау жөніндегі комиссия кеңесінің кезекті отырысы өтті. Оған аудандағы кәмелетке толмағандар мен әйелдерді отбасылық-демографиялық саясатта қорғау ісі бойынша комиссиясының бас инспекторы Назира Тоғызбаева, аудан прокурорының орынбасары Талғат Уражанов, ауданның мектеп директорлары мен тәрбие ісі жөніндегі орынбасарлары, медициналық орталықтардың бас дәрігерлері мен балабақшалар меңгерушілері қатысты.

Жиынның басты мақсаты – жастар арасында орын алатын қылмыстың алдын-алу, жастар нашақорлығы, сондай-ақ, мектеп оқушылары арасында болатын ерте жүктілік және өзіне-өзі қол жұмсау секілді балалар мен жастар арасында кездесетін қайғылы оқиғаларды жою болып табылады. Бұл ретте отбасы, мектеп, мемлекеттік мекемелер және құқық қорғау органдарының бірлесе жұмыс жасауының маңыздылығы атап өтілді. Осыған байланысты аудан бойынша біршама жұмыстар жасалды. Мысалы, нормативті-құқықтық база қайта қаралып, алдын-алу жұмыстары негізінде дөңгелек үстелдер, семинарлар мен конференциялар ұйымдастырылды. Сонымен қатар, жоспарға сәйкес Бостандық ауданы әкімшілігінің кәмелетке толмағандармен жұмыс жөніндегі комиссияның отырысы өтіп тұрады. Онда жастар мен балаларды зорлық-зомбылықтан қорғау, оларды қылмыс пен құқықбұзушылықтың қандай нәтижелерге ұрындыратыны секілді мәселелер қаралды. Соның салдарынан биыл жастар арасындағы қылмыстың өткен жылға қарағанда азаюы байқалады.

Дегенмен, ауданда бұл тұрғыда әлі де жасалатын жұмыстар жеткілікті. Солардың бірқатары осы жиында талқыға салынды. Соның негізінде аудан бойынша кәмелетке толмағандардың ерте жүктілігі мен өзіне-өзі қол жұмсау мәселелері бойынша ауданның білім бөлімінің басшысы Қайрат Жұманов баяндама жасады. Сосын аудандағы кәмелетке толмағандармен жұмыс жасайтын полиция бөлімі бастығының міндетін атқарушы Айдын Салиев биылғы 10 айда атқарылған жұмысты тарата айтса, ал оларға психологиялық,-психиатриялық көмек көрсету орындары жайлы аудандық медицина бөлімінің бас дәрігері Зухра Омарова тілге тиек етті.

Сондай-ақ, жиналыста кәмелетке толмағандар арасында құқықбұзушылықтың алдын алу жөніндегі жұмыстың тиімділігін арттыру және өмірде қиын жағдайға душар болған жасөспірімдерге қолдау көрсету, ата-аналар мен балалардың құқықтық мәдениет деңгейін көтеру, олардың құқықтарын қорғау және балаларға қатысты зорлық-зомбылықтың алдын алу, бала құқықтарының сақталуына жағдай жасауға қатысты өз ұсыныстарын ортаға салғандар көп болды. Сөйтіп, жиын соңында Бостандық ауданының кәмелетке толмағандардың құқығы мен оларды қорғау ісі жөніндегі ведомствоаралық комиссияның хаттамалық шешімдеріне өзгертулер енгізу және толықтырулар мен қайта қарау туралы шешім қабылданды.

Құттыбек АЙМАХАН