Көкжайлау шатқалының 10 гектар жері Іле-Алатауы табиғи паркіне қайтарылады

Қала әкімі Бауыржан Байбек Көкжайлау курортын дамыту туралы көшпелі жиын барысында курорттың 100 га жерін Іле-Алатау паркіне қайтаруды тапсырды.

«Almaty Mountain Resorts» ЖШС басшысы Наиль Нұров айтқандай, бүгінде тау шаңғысы курортының аумағы алғашқы нұсқасынан екі есе оңтайландырылған.

«Құрылыс алаңы 300 мың шаршы метрден 30 мың шаршы метрге дейін, яғни 10 есе қысқарды. Шаңғы трассасы 77-ден 18-ге дейін азайды. Қонақ үйлердің сыйымдылығы 6,5 мың орыннан 250-ге азайды. Жасанды қар төсеуге арналған екі көлдің біреуі ғана қалды. Осыған байланысты 1002 га жерден 100 га аумақты босаттық. Болашақта босатылатын жер көлемі одан да көп болуы мүмкін», - деді Наиль Нұров.

Қала басшысы Көжайлау жерін Іле Алатауы паркіне қайтару мәселесін шұғыл арада қарауды тапсырды.

Айта кету керек, Көкжайлау курорты бойынша техникалық-экономикалық негіздеме биыл аяқталады. Содан соң аталған жоба қоғамдық талқылауға салынады.

Көкжайлау – 2251 метр биіктікте тұрған шағын және қолайлы үстірт Үлкен Алматы өзенінің алабына жататын Терісбұтақ шатқалына қарай аздап еңістенеді. Бұл үстірт Кіші Алматы мен Үлкен Алматы шатқалдарының арасындағы өзіндік асу іспетті.

Айта кетейік, Көкжайлауға көтерілу үшін шатқалдың солтүстік суайрығына шығу қажет. Бұл бағыт жұртшылыққа кеңінен танымал, өйткені Көкжайлауға әр тұсынан небәрі бір күн ішінде шығуға болады. Соның бірі Терісбұтақ өзені бойымен Үлкен Алматы шатқалына түсер бағыт және «Обсерватор қыраты» арқылы қалаға түсер бағыт, сондай-ақ Каменский қыратымен Кіші Алматы және Каменское шатқалы арқылы «Ақ қайың» санаторийіне немесе Кіші Алматы шатқалындағы Бутаковка аялдамасына түсер бағыттар.

Бірақ ең басты бағыт – әрине Құмбел шыңы арқылы шығу. Көптеген танымал және атақты алпинистер мен туристер өздерінің ең алғаш шыққан тауы ретінде Құмбелді атайды. Қала жақындығы, шығудың оңайлығы және тамаша панорамасы бұл жерді танымал еткен. Көкжайлаудың өзі болса Іле Алатауы мен тау етегінде жатқан қаланың, сондай-ақ Іле алқабының біршама бөлігінің тамаша панорамасын көруге мүмкіндік береді. Көкжайлауға шығаратын жоғарыда аталған бағыттардың барлығы демалыс күндері туристердің жолына айналады. Көкжайлауда шағын жекеменшік аспалы жол да бар.

Қазіргі уақытта Көкжайлау шатқалында таулы курорт құрылысы жүріп жатыр.

Ақбота МҰСАБЕКҚЫЗЫ