Алматы әкімі Атакенттегі алып тиін өз шығынын өтегенін айтты

«Қала көркін ажарландыра түскен сайын мәдени интервенцияға жақындаймыз. Алматының әр түкпірінде байқау түрінде 16 артобьект қойылды. Қала болашағын әлемдік деңгейге көтеруде американдық компаниямен жұмыс істеп жатырмыз. Бизнестің ең дамыған түрі - туризм. Дәлірек айтсақ, мәдени,  event- туризм. Бұл елімізге  мол табыс әкеледі.  Қала  туралы айту керек, оны әлемге таныту  керек. Дүниежүзінде мемлекет келбетіне айналған 600 қала бар. Қазақстаннан жалғыз Алматы осы тізімге енген», - деді әкім.

Оның айтуынша, Алматы туралы әлемдік деңгейде айтылу керек. Соның айқын дәлелі  - тиін төңірегінде қызған пікірлер.  «Алып мүсіннің бағасына келер болсақ,  23 миллион теңгенің 15 миллионы ғана  қала бюджетінен бөлінген.  Әлемдік өлшемге сүйенсек, бұл аса қымбат өнім емес. Тиінді жасаған автордың сөзінше, оның осыған ұқсас шығармасы Шанхайдағы «Түлкі» 100 мың долларға түскен. Оның көлемі біздің тиіннен екі есе кішкентай. Өткенде бір ақпарат оқыдым, үнді мүсіншісі Алиш Копурдың болаттан құйылған 10 метрлік бұйымы миллион долларға бағаланған. Мұндай мысалдар өте көп», - деді ол.

«Біздің объектіге жұмсалған шығын өтелді деуге болады. Неге десеңіз, тиін туралы әлемдік БАҚ жарыса жазды. Оның ішінде ВВС, New Yourk Post, Fox News бар. Бұған көрші Ресей мен өзіміздің масс-медианың шулағанын қосыңыз. Тиінге төккен тиынға осынша ақпараттық  дүмпу көтере алмас едік. Енді елге келген туристер бірінші кезекте тиінді көруге асығады. Қазақстанның өзге өңірлерінен Алматыға қыдырып келген қонақтар енді Шымбұлақ пен Медеу үшін емес, атышулы  тиін үшін келеді», - деді Байбек.

Қала басшысының пайымдауынша, тиін алматылықтардың жаңа құбылысты қабылдай білуіне, алға жылжуына ықпалын тигізбек.