Тоқаев мемлекеттік тілден емтихан тапсырып, бірде-бір сұрақтан сүрінбей өтті

Орталық сайлау комиссиясының мәліметінше, лингвистикалық емтихан барлық үш кезеңде бойынша өтті: тақырып бойынша жазбаша тапсырма жазу, мәтін оқу және лингвистикалық комиссия берген тақырыпқа көпшілік алдында кемінде он бес минут сөз сөйлеу. Емтихан тапсырылғаннан кейін лингвистикалық комиссия талқылау өткізіп, қорытындылады.

Комиссия жұмысы ашық және жариялы түрде жүзеге асырылды, ал бұқаралық ақпарат құралдары шешім қабылдау процесін байқауға мүмкіндік алды. Отырысқа Орталық сайлау комиссиясының мүшесі Сүлеймен Ләззәт Жаңылысқызы қатысты.

Жазбаша жұмыстың тақырыбы «Абай Құнанбайұлының поэзиясы мен қара сөздері» болды. Жазбаша жұмысының мазмұнында Абай шығармалары мен еңбектерін терең білетіні байқалды. Жазбаша жұмыс мазмұны, стилі, емлесі, тыныс белгілері бойынша бағаланды. Жазбаша жұмыстың тақырыбы толығымен ашылған.

Екінші тапсырма бойынша үміткер жазушы Шерхан Мұртазаның «Мыңбұлақ» кітабынан үзіндіні эмоционалды түрде, мәнерлеп, дауыстап оқып шықты.

Үшінші тапсырма бойынша Президентке үміткер «Қазіргі Қазақстанның геосаясаты» тақырыбы бойынша өз ойын 15 минутта ауызша айтып берді. Ойын қазақша еркін жеткізді, сөйлем құрауы дұрыс.

Емтихан қорытындысы бойынша лингвистикалық комиссия Қазақстан Республикасының Президенттігіне үміткер Қасым-Жомарт Кемелұлы Тоқаевтың мемлекеттік тілді еркін меңгергендігі туралы ашық дауыспен шешім қабылдады.