Шымкентте дала-орман өрттерін болдырмау бойынша оқу-жаттығу өткізілді

«Шымкент-Ташкент» тасжолы 5-шақырымның сол жақ бетінде «Жасыл белдеу» орман қорының аумағында дала-орман өрттері бойынша өрт-тактикалық оқу-жаттығу өткізілді. Жазғы өрт қауіпті кезеңінің басталуына байланысты Шымкент қаласының аумағында орман, дала өрттерінің алдын алу және дер кезінде сөндіру мақсатында өткізілген оқу-жаттығуға ТЖ департаментінің, жергілікті атқарушы органдарының басшы құрамы, орман шаруашылықтарының өкілдері қатысты.

Оқу-жаттығудың жоспарына сәйкес, «Жасыл белдеу» орман қорында 1 табиғи өрт ошағы пайда болып, 3 бағытта таралды. Өрт жақын орналасқан Сәуле, Ақтас елді мекендері мен егістіктерге тікелей қауіп төндірді. Өрт ошағын жедел сөндіру үшін 6 өрт сөндіру, 4 су тасығыш техникасы, 4 трактор соқасымен бірге 120 адам жұмылдырылды.

Сондай-ақ көршілес Түркістан облысының аумағындағы егістікке өрттің қаупі төніп тұруына байланысты өзара әрекет ету жоспарына сәйкес, Түркістан облысы ТЖ департаментінен 3 арнайы өрт сөндіру техникасы мен жеке құрамында 12 адам, №35748 әскери бөлімінен 1 техника, 10 адам көмекке келді.

Оқу-жаттығуға басшылық еткен қала әкімінің орынбасары Н.Ергешбек және ТЖ департаментінің басшылары күш және құралдардың дала-орман өрттерін дер кезінде сөндіруге дайындығына жоғары баға берді.

«SN.kz»-ақпарат.