Сағынтаев Үкімет отырысын оңтүстік өңірдегі дауылдан бастады

«Үкімет отырысының кезекті отырысын бастамас бұрын қатты дауылдан зардап шеккен оңтүстік өңірлердегі, әсіресе, Жамбыл облысындағы төтенше жағдайға тоқталғым кеп отыр. Табиғи апаттан инфрақұрылым нысандарына зақым келіп, бірнеше аудан жарықсыз қалды. Қатты жел ғимараттар мен үйлердің шатрыларын жұлып әкетті. Мен дереу облыс әкімдері мен тиісті мемлекеттік органдардың басшыларына шұғыл тапсырма берген болатынмын. Сондай-ақ осы мәселені Асқар Ұзақбайұлына бақылауға алуды тапсырамын. Кәрім Нәсбекұлы, жағдайды қалпына келтіру бойынша қандай жұмыстар атқарылды, баяндаңыз», - деп сұрады Б.Сағынтаев.

«Табиғи апаттан Тараз қаласындағы және облыстың бес ауданындағы нысандар зардап шекті. Барлығы 1 754 нысан зардап шекті, оның ішінде 454 нысанның шатырының 70% зақымданды. 53 мың абонент электр желісінен ажырап қалды, бес елді мекенде газ беру тоқтады. Шұғыл түрде ТЖ салдарын жою шараларын қабылдадық, күштер мен азаматтық қорғаныс құралдарын жоғары әзірлікке көшірдік, қоғамдық тәртіп пен жол қозғалысын күшейттік. Шұғыл жұмыстар нәтижесінде сол күні, 3 қарашада газ беру қалпына келтірілді, 4 қарашада халыққа жылу беру жалғастырылды, 6 қарашада ауылдық елді мекендерде электр желісін беру қалпына келтірілді. Бүгінде Таразда жекеменшік тұрғын үй секторындағы 351 абонентке жарық беру жұмыстары жалғасып жатыр. 36 азамат медициналық көмекке жүгінді, оның 4-уі ауруханаға жатқызылды. Тараз қаласында, Байзақ, Мойынқұм және Шу аудандарында жергілікті маңызға ие ТЖ режімі енгізілді», - деп хабарлады Жамбыл облысының әкімі К.Көкірекбаев. Өз кезегінде, ОҚО әкімі Ж.Түймебаев облыста қалпына клетіру жұмыстары жүргізіліп жатқанын хабарлады.

Еске салайық, 3 қараша күні Жамбыл және Оңтүстік Қазақстан облыстарында екпіні секундына 30 метр жылдамдыққа жеткен қатты жел тұрып, соның салдарынан Жамбыл облысының Байзақ, Жамбыл, Жуалы, Шу аудандары зардап шеккен болатын.