Құлсарыда бір отбасының екі бірдей мүшесі жоғалып кетті

 Құлсарыда екі ер адам – әкесі мен ұлы жоғалып кетті. Олар резеңкелі қорғаныс костюмдерін киіп, топан су басқан үйлерін тексеруге кеткен, бірақ әлі күнге дейін олардан хабар жоқ, деп хабарлайды Skifnews.kz ақпарат порталы.

КТК телеарнасының мәліметінше, Атырау облысының Құлсары қаласында Жем өзенінің тасуы салдарынан су басқан. Соның  салдарынан екі ер адам із-түссіз жоғалып кетті. Телеарна дерегінше, әкесі мен баласы резеңкелі қорғаныс костюмдерін киіп, топан су басқан үйлерін тексеруге кеткен, содан бері олардың қайда екені белгісіз.

3 мыңға жуық үй мен объектіні топан су басқан. Кейбір жерлерде үйлерінен шығып үлгермеген адамдар бар, оларды құтқарушылар құтқарып отыр. Ал аулалардан жүздеген үй жануарлары мен ірі қара мал шығарылып жатыр.

Өткен демалыстарда Құлсарыда дүкендер, дәріханалар мен жанармай құю бекеттері жабылған болатын. Бүгінде бұл нысандардың басым бөлігі қайта жұмысын жандандырды.

«Құлсары қаласындағы жағдай үш күн бұрын ушығып кеткен болатын. Қазір су тартылып жатыр. Әлі де су шайып жатқан жолдар бар. Жалпы айтқанда, су деңгейі 40 сантиметрге, кей жерлерде 20 сантиметрге дейін төмендеген», – деді Атырау облысы Төтенше жағдайлар департаментінің басшысы Жантөре Демешов.