Қарағанды көшесінде көлікке тағы да оқ атылды (ВИДЕО)

Қарағандыда тағы да жолда оқ атылды. Көлігі зақымданған жүргізуші суық қаруды ойыншыққа айналдырған бұзақыларды ұстауды талап етіп отыр. Бұл – осы айда тіркелген екінші оқиға, деп хабарлайды astanatv.kz.

Тапа-тал түсте көшеде келе жатқан көліктің терезесіне белгісіз біреу травматикалық қарумен оқ атқан. Жапа шегуші бұл туралы әлеуметтік желіде жазды. Оның айтуынша, оқиға Бұқар жырау даңғылы мен Чкалов көшелерінің қиылысында болған. Сағатына 10 шақырым жылдамдықпен бұрылып бара жатқан жүргізуші көлігінің артқы терезесіне белгісіз біреу оқ ата сала, ізін суытқан.

Жәбірленушінің бейнежазбасынан кейін бұзақыны полиция іздестіріп жатыр.

«Бұзақылық бабымен тіркеліп, қылмыстық іс қозғалды. Бұзақыны анықтау мақсатында жедел іздестіру шаралары жүргізіліп жатыр», - деді Қарағанды облыстық Полиция департаментінің баспасөз хатшысы Жанатай Сембеков.

Қарағандыда мұндай оқиға жиілеп кеткен. Еске салсақ, айдың басында белгісіз біреулер кешқұрым аялдамада тоқтап тұрған 4 бірдей автобусқа оқ жаудырды.

Тапаншаның дыбысынан сасқан жолаушылар мен жүргізушілер жан-жаққа қашқан еді. Кейбірі психологтың көмегіне жүгінсе, кейбірі жеңіл жарақаттанған. Өкінішке қарай, бұзақылар әлі ұсталған жоқ.