Күші көп әжей үйіне түскен ұрыны үстелмен ұрып құлатты

Американың Рочестер қаласының тұрғыны үйіне келген ұрыны үстелмен ұрды, деп хабарлайды  Wham-tv.

Уилли Мерфидің бірнеше спорттық наградасы бар, бодибилдингпен айналысады. Оның айтуынша, белгісіз біреу сағат 23:00-де есік қаққан. Ол жедел жәрдем шақыруды сұрапты. Алайда, зейнеткер бір нәрсені сезіп, есік ашпаған. Сол кезде ұры есікті қиратып кіріпті.

Мерфи бірден полицияға хабарласқан. Алайда, оған тәртіп сақшыларының көмегі қажет болмады. Әйел бірден қолына түскен үстелді алып, ер адамға лақтырған.

"Үстел қирап, ұры жерге құлады", - дейді қария. Бұдан соң әжей ұрының бетіне сусабын құйып, соққылай бастаған.

Оқиға орнына келген полицейлер таңғалысын жасырмады. Олар, тіпті, әжеймен фотоға түскен. Ал жолы болмаған ұры ауруханаға жеткізілді.

Дереккөз: Sputniknews.kz