Денсаулық сақтау басқармасы жаңа туған шақалақтың вакцинациядан көз жұмғанын жоққа шығарып отыр

Алматы перзентханасында туғанына он күн болған шақалақ шетінеп кетті, деп хабарлайды ҚазАқпарат.

 Қайғылы оқиға Алматы қаласындағы Түрксіб ауданында болған. 9 қаңтар күні дүниеге келген ұл бала небәрі он күн өмір сүрді. Шақалақ 19 қаңтар күні шетінеп кетті.

 Туыстарының айтуынша, бала перзентханада салынған «В» гепатитіне қарсы екпеден көз жұмған. Алайда қалалық қоғамдық денсаулық сақтау басқармасы сәбидің вакцинациядан көз жұмғанын жоққа шығарып отыр.

 «Тауарлар мен көрсетілетін қызметтердің сапасы мен қауіпсіздігін бақылау комитетімен бірге арнайы комиссия құрылды. Оның құрамына жоғары медициналық мекемелердің өкілдері, тәуелсіз сарапшылар бар. Комиссиялық тексеру нәтижелері бойынша өлімнің себептері мен жағдайлары нақтыланады. Басқарма нәрестенің туған – туыстарына қайғырып көңіл айтады, бұл факт қала басшылығының бақылауында. Тексерудің қорытындысы құқықтық баға беру үшін құқық қорғау органдарына жіберіледі», – деді қалалық денсаулық сақтау басқармасы.