Алматыда қылмыскерлер Тәжікстан азаматын ұстап әкетіп, туыстарын бопсалаған

Алматыда ұрланған 27 жастағы Тәжікстан азаматын босату бойынша арнайы операция жүргізілді, деп хабарлайды Skifnews.kz ақпарат порталы, қалалық Полиция департаментінің баспасөз қызметіне сілтеме жасап.

Полицияға оның ұрланғаны туралы шағымды танысы түсірген. Ер адамның айтуынша, оның ұрланғанын жұбайы бірінші білген. Адам ұрлаушылар күйеуін босату үшін әйелге хабарласып, 40 мың доллар сұраған. Әйел ақшаның бір бөлігін қылмыскерлерге беріп үлгерген.

«Оқиға туралы белгілі болғаннан кейін жедел тергеу тобы құрылды. Бірнеше сағат өткен соң күдіктілердің кім екені, сондай-ақ, ұрлап әкеткен адамның қайда екені белгілі болды. Операция сәтті өтіп, Тәжікстан азаматы босатылды», - деді Алматы қаласы Полиция департаменті бастығының орынбасары Берік Әбілбеков.

Аталған қылмысты жасады деген күдікпен Тараз қаласының үш тұрғыны ұсталды, оның екеуі бұған дейін істі болған. Зардап шегушіні ұстап отырған жерден тәртіп сақшылары травматикалық тапанша, патрондар және есірткі тапқан. Сәйкес сараптама тағайындалды.

Аталған факті бойынша ҚР ҚК-нің 125-бабы 2-бөлігі («Адам ұрлау»); 126-бабы 2-бөлігі («Заңсыз бас бостандығынан айыру»); 194-бабы 2-бөлігі («Бопсалау»); 287-бабы («Заңсыз қару сақтау»); 296-бабы («Заңсыз есірткі құралдарын сақтау») бойынша бірден 5 қылмыстық іс қозғалып отыр.

«Күдіктілер қамалды. Сотқа дейінгі тергеу аяқталғанша қамауға алу түріндегі бұлтартпау шарасы тағайындалды», - деп хабарлады Берік Әбілбеков.