Төреғали Төреәлінің адвокаты оның есірткі қолданғанын жоққа шығарды

Әнші Төреғали Төреәлінің адвокаты Эльнура Кишкенебаевамен Massaget.kz тілшісі сұқбаттасып, бірқатар сұраққа жауап алған екен, деп хабарлайды Skifnews.kz ақпарат порталы. 

Әншінің қорғаушысы ол көлік тізгіндеген кезде ешқандай есірткі қолданбағанын, тіпті сараптама қорытындысында да есірткі жоқ екені анықталғанын айтты.

Есірткі қолданған жоқ. Ол әңгіме полиция тарапынан сүйене отырып айтылған. Бірақ эксперттің берген қорытындысымен біз келіспей, өзіміз тағы жеке сараптама тағайындадық. Ол қорытынды бойынша ешқандай есірткі жоқ екенін біз анықтадық. Жаңадан ашылған мән-жайлар бойынша сотқа талап арыз береміз. Бұл жөнінде алдағы уақытта қарастырамыз, - дейді қорғаушы.

Адвокат Эльнура Кишкенебаева 40 сағаттық жұмысқа тарту жазасымен келіспейтіндерін айтты. 

40 сағаттық қоғамдық жұмысқа тартуға біз келіспейміз. Тағылып отырған айып билік өкілін қорлау. Дегенмен менің қорғауымдағы азаматтың іс-әрекеті билік өкілін қорлау болып табылмайды. Билік өкілдеріне қарсы ешқандай қорлау іс-әрекеттерін байқаған жоқпыз, көрген жоқпыз. Тіпті менің қорғауымдағы азаматты полиция қызметкерлері тоқтатқан кезде ол көлігінен түсіп, Ассалаумағалейкүм деп амандасқан. Егер қорлау, балағат болса ол солай құзырлы орган өкілдіріне сыйластық танытар ма еді? Бейнежазбаларды біз сот барысында көрдік, бірақ олай айтылған, қорлау сөздерін байқамадық, - дейді Эльнура Кишкенебаева.

Тергеу кезінде көптеген уәж айтылмағанын жеткізді.

Тергеу кезінде айтылмаған уәждер көп. Полиция тарапынан берілген бейнежетондар. Олар ондағы видеодан өздеріне ұтымды жағын көрсеткен. Ал бізге ұтымды жағы дұрыс көрсетілмеген. Сотта біз бейнежазбаларды сұратқан кезде нақты полиция тарапынан заңсыз іс-әрекеттерін біз байқадық, - дейді ол.

Сот толыққанды аяқталды ма?

Сот мұнымен толыққанды аяқталған жоқ. Алда әлі аппеляциялық шағым түсіруге әбден құқығымыз бар. Біз қорғауымыздағы азаматты ақтап, оның ешқандай кінәсі жоқ екенін дәлелдеп шығуға әрекет жасаймыз, - дейді ол.

Адвокат өнер адамдарын қорғау қиын еместігін жеткізді.

Өнер адамына адвокат болу қиын емес. Олда өзіміз секілді қарапайым адам. Ешқандай еркелігі жоқ. Барлығын өз ретімен қабылдап отырды. Кеткен қателіктері болса, жазасын өтеп отырды. Заң бәріне ортақ екенін ол жақсы біледі. Заңға бағынады. Ал тікелей мына қылмыстық іс бойынша келіспейтін тұстарын айтып өтті, - дейді адвокат.

Айта кетейік, Алматыда танымал әнші Төреғали Төреәлі ұсталған видео тараған болатын. Кейінірек оның есірткіге мас болғаны айтылды.