Дариға Бадықова: Халыққа уын шашып отырған адамдар бар

Актриса Дариға Бадықова «Таптым-ау сені» түсірген фильмін сынағандарға жауап берді. Бұл туралы Skifnews.kz ақпарат порталы «Aq pen qara» подкасына сілтеме жасап хабарлайды.

Оның сөзінше, «мұндай фильм түсіретіндерді соттау керек» деген сөзбен ғана келіспеген. Туындысынан сотқа сүйрейтіндей олқылық көрмеген.

«Халықты төмендетіп, «деградация, халықтың деңгейінің жеткен жері осы екен» деп айтып жүрген, халыққа уын шашып отырған адамдар бар. Сен кімсің халықты қолыңа қару қылып, манипуляция жасайтын?! Бұл бәріне қатысты, Ермек аға Тұрсынов болсын, басқасы болсын, мен «кімсің сен?» деп айтар едім. Халықтың деңгейі әлдеқайда өсіп кеткен. Қазір әр үйдің теледидарында мыңға жуық арна көрсетіледі. Халық не көретінін өзі біледі. Сонау 90-жылдар емес қой, бар-жоғы үш арнаны көріп отыратын. Сондықтан халықты төмендетіп, өзін биік еткен адамның ісі дұрыс емес. Халық өнерді әртүрлі қабылдайды. Халықта жан бар, жүрек бар, тұрмыс-тіршілігі мен бала-шағасы бар. Халық өзіне керегін алады, керек емесін сызып тастайды. Олар да ақымақ емес. Кез келген адам үйінде жатып ғаламторға кіреді де өзінің қалаған жанрында фильмін көре алады. Ал біз түсірсек, «мұндайды көрмеу керек, соттау керек» деп шығады. Сотқа сүйрейтіндей қандай кадр көріп тұрсыз?! «Фильмнен не тәрбие аламыз?!» деген пікір – қате. Мен керісінше, фильмнен «мынандай дүниелерден аулақ болайық» деген түйін жасаса екен деймін, – деді ол.

Сондай-ақ актриса сынап жатқан кино саласының мамандарына фильмді өз қаржысына түсіргенін тағы бір мәрте қайталады.

«Мемлекеттен бір тиын алмай, қарызданып, қауқаланып жүріп түсірдім. Бір қызығы, сынап жатқан кісілер мемлекеттен қаржы алып, онысын келістіре алмай, талан-таражға түсірді. Ал қарызданып кино түсіріп жүрген, кино әлеміне енді аяқ басып келе жатқан жас қыздың жұмысын тұншықтырып тастайды. Мен халыққа тек алғысымды білдіремін. Қоғамнан маған қолдау өте көп. Қайталап айтамын, бір-екі адамның сөзіне бола, халықты төмендетуге жол бермеу керек», – дейді продюсер.