«Рөлім үшін тырнап, жағамнан алды»: Әбілмансұр Серіков танымал болудың қиындығын айтты

Қазақстандық танымал актер Әбілмансұр Серіков басынан өткен қызықты оқиғаны айтып берді. Сөзінше, көрермендердің бірі оны кинодағы рөлі үшін жағадан алған, деп хабарлайды Skifnews.kz ақпарат порталы. 

Әбілмансұр Серіков өзіне танымалдылық әкелген рөлдері туралы айтып, басынан өткен қызықты оқиғаны баяндады. Кинодағы рөлі үшін актерге көрермен шабуыл жасаған екен.

"Көшеде танып жататыны рас. Танымалдылық әкелген түрлі рөлім бар. Үлкен буын көбіне "Дос-Мұқасандағы" кейіпкерім арқылы таниды. Осы рөліме қатысты қызықты оқиға болды. Мейрамхана алдында әңгімелесіп тұрсақ, бір апа келіп тырнағымен мойныма жармасады ғой. Шошып кеттім. "Тәте не болып қалды?" деп сұрадым. Ол кісі маған "Неге оларға тиісе бересің?" демесі бар ма?! Сөйтсем "Дос-Мұқасан" фильмі туралы айтып тұр екен. Солай рөлім үшін жағадан алды. Ертесіне түсірілімге келсем, мойным қанталап кетіпті. Жастар қауымы "5:32", "Ауыл мұғалімі" атты жобалар арқылы таниды", - деді өнер иесі.