«Ешкімнің қызметіне таласқан емеспін»: Магистр атанған Мейрамбек Беспаев өзін сынағандарға жауап берді

Әлеуметтік ғылымдар магистрі атанған әнші Мейрамбек Беспаевтың диплом алғанына қуанғандармен бірге сынағандар да бар. Соған байланысты қазақтың қоңыр үнді әншісі өзіне қаратып айтылған, «Әнші – магистр мен докторларға айналды» деген сын пікірге жауап берді.

«Қадірлі, достар! Өкінішке қарай, біздің арамызда қуанышқа ортақтаса алмайтын, іштарлығы бар адамдар да кездеседі. Өзі ұстаз, өзі журналист-ғалым Мырзантай Жақып деген ағамыз фейсбукте мені ғалым болып біреудің орнын тартып алғалы жүрген адамдай сипаттапты. Менің өнерде өз жолым бар. Ешкімнің жолына да, қызметіне де таласқан емеспін», – деп жазды Мейрамбек өз Instagram-парақшасында.

Бүгін ғана магистр атанған әнші дипломды өзінің адал білімімен алғанын айтады. Диссертациясын Түркия, Әзербайжан елдері елшілігінің қатысуымен қорғаған. Сол себептен де әнші жұрттың өзіне күмән келтірмеуін сұрайды.