$ 448.15  483.46  4.86

Тағы да сол жоңғармен соғыс: 12 наурызда «Батырлар» фильмі прокатқа шығатын болды

17-ғасырдың басы. Жетісу жерін жаулап алған жоңғарлар жазғы жайлауларды еркін жайлаған. 19 жастағы Қарасай елін жаудан қалай азат етуді ойлайды...

«Батырлар» фильмі жақында прокатқа шығады. Көшпенділер дәуірі туралы ауқымды тарихи драма қазақ батырларының жоңғармен соғыстағы ерлігін дәріптейді. Түсіру тобы мұрағат ақтарып, тарихшылармен кеңесіп, фильмде көптеген шынайы реквизиттерді пайдаланған, деп хабарлайды «Хабар 24» телеарнасы.

Тарих қойнауында жатқан бірнеше ғасыр бұрынғы оқиғаларды кино тілімен сөйлеткен туынды 12 наурызда экранға шығады. 17-ғасырдың басы. Жетісу жерін жаулап алған жоңғарлар жазғы жайлауларды еркін жайлаған. 19 жастағы Қарасай елін жаудан қалай азат етуді ойлайды...

«Әдетте бізде кинода батыр боп танылған, ерлігімен елін қорғаған тұлғаларды көрсетіп жатады. Ал мен жас жігіттің батыр болып қалыптасу жолын көрсеткім келді», - дейді фильм режиссері Асқар Ұзабаев.

Киноны түсіру барысында режиссер тарихшылармен бірнеше ай бойы кеңескен. Қазақстанның оңтүстік өңіріндегі табиғат фильм түсіруге үлкен мүмкіндік берді. Алайда, ауа райының құбылуы біршама кедергі келтірген. Дегенмен, түсіру жұмыстары тоқтамаған.

«Бір үлкен сахнаны 5 күн бойы түсірдік. Бұл ауқымды шайқасқа «Номад» каскадерлері қатысты. Жауды еңсерген соғыс көріністеріне 70 каскадер атымен, оған қоса 50-ге жуық жаяу жауынгерлер атсалысты», - дейді режиссер.

Актерлерге атпен шабуды меңгеріп қана қоймай, жыртқыш аңның тілін табуға тура келген. Кино үшін жас жолбарыс Мәскеуден арнайы әкелініпті. Түз тағысының қай эпизодта болатыны әзірге құпия. Ерекше көрініске көрермен премьерада куә болады.

«Аңды жеткізуде қиындықтар болды. Жолбарысты тасымалдау үшін тиісті анықтамалар керек екен. Киноны түсіру кезінде оны жоғалтып ала жаздап, абырой болғанда тауып алдық. Арнайы қорекпен қоректенетін жолбарысты бірге келген үйретуші қыз баптады», - дейді продюсер Ринат Сафаров.

Сіздің реакцияңыз?
Ұнайды 0
Ұнамайды 0
Күлкілі 0
Ашулы 0

Серіктес жаңалықтары