Түркиядағы лаңкестіктен қаза тапқандар саны 39 адамға жетті

Түркияда жаңа жыл түні орын алған лаңкестіктің салдарынан қаза тапқандар саны 39 адамға жетті деп хабарлайды BBC News. Оқиға Стамбұл қаласындағы Reina түнгі клубында орын алған. Бетперде киген екі адам ғимаратқа басып кіріп, автоматты қарумен келушілерге қарай оқ жаудырыпты.

Қанды қырғыннан жарақат алғандар саны 60 адамнан асты. Олардың төртеуі хал үстінде.

Түркия премьер-министрі Бинали Йылдырым лаңкестік оқиғаның артында кімдердің тұрғанын білмейтінін айтты. Дегенмен, алғашында айтылғандай, содырлар Санта-Клаустың киімінде болмаған. Оның айтуынша, қылмыскерлер әлі қолға түспепті.

"Полиция мен қауіпсіздік күштерінің өкілдері лаңкестерді ұстау операциясының барысы жайында ақпараттандырып отырады", - деп мәлімдеді ел премьері.

Қазір Стамбұлда оқиғадан қаза тапқандарды жерлеу рәсімдері басталып кетті. Ислам шарттарына сай, марқұмдардың денесі барынша тезірек жер қойнауына тапсырылады.

Айта кету керек, қайтыс болғандар қатарында шетелдің 16 азаматы бар. Олар, Түркияға Сауд Арабиясынан, Израильден, Ливан, Ливия, Иордания, Франция және Бельгия елдерінен келген.