Шымкентте төрт балалы ана қуықтай жерде тұрып жатыр

Тіпті, жәрдемақының өзін ала алмай отыр.

Нина Кириченконың төрт баласының үлкені Жора 10 жаста, одан кейін Богдан, Роза, ең кішкентайы Татьяна 2 жаста. Анасының айтуынша, балаларды әкесі аямай ұрып-соғып, жасқаншақ қылып тастаған. Балалар болса, жаңа ойыншықты қолдарына ұстап көрмепті. Жанашыр адамдардың берген ескі ойыншықтарымен ойнап жүр.

Анасының сөзіне қарағанда, азын-аулақ нәпақа төрт баланың азығынан ауыспайды. Рамазан айында жаны жомарт адамдар азық-түлікпен көмектестіпті. Бірақ, «оны қысқа сақтап қойдым», дейді Нина.

— Менің барлық құжаттарым қолымда, тіркеу қағазыма дейін бар. Бірақ, маған неге көмек көрсетілмейтінін түсінбеймін. Жәрдемақы неге берілмейді? Баспана неге берілмейді? Мен өзім жетіммін, туысқан ешкімім жоқ, — дейді көпбалалы ана.

Ал, Нина тұрып жатқан үйдің қожайыны Анна Кожакина бұл отбасының көріп отырған қиыншылығын көрудің өзі жүрекке ауыр тиетіндігін жеткізді.

— Ол маған қыстың күні жылап келді. Балалары жұқа киінген. Менен көмек сұрады, үйіңе кіргізші деп өтінді. Жағдайының қиындығын көріп, үйіме кіргізіп алдым, — дейді Анна Кожакина.

Нинаға пәтер жуық арада тимейтін сияқты. Себебі, ол баспана кезегінде 4856-шы болып тұр екен. Тағдырында талай қиындықты бастан өткерген әйел жомарт жандардан көмек сұрайды.