Өзбектерге Кеден одағының аумағына насыбай алып кірмеу мәселесі ескертілді

Өзбекстан мемлекеттік кеден комитеті Кеден одағына мүше елдердің (Беларусь, Қазақстан, Ресей) насыбайға тыйым салынғанын азаматтардың есіне салды, деп хабарлайды Қазақпарат.

Темекі мен өзге қоспалардан тұратын насыбай Өзбекстан мен оған көршілес елдерде кеңінен тараған. Кеден одағы елдеріне насыбайды алып кіруге, айналымға жіберуге өндіруге және сақтауға тыйым салынған.

Өзбекстанның Мемлекеттік кеден комитетінің деректері бойынша, 2016 жылы бір ғана «Ташкент-Минск» әуе рейсінің жолаушыларынан 100 келіден астам насыбай тәркіленген (43 кедендік заңнаманы бұзу фактісі бойынша).

Құқық бұзушылар барған елдің заңнамасы бойынша жауапқа тартылады. Тәртіпті сақтай отырып, жолаушылар өзін ғана емес, өз елінің абыройын да қорғайды, делінген Өзбекстан кеден мекемесінің хабарламасында.