Рудныйда кішкентай бала ағаштан құлап, жансақтау бөліміне түсті

Рудный қалалық көпсалалы ауруханасының жансақтау бөліміне 2015 жылы туған бала түсті. Бала ағаштан құлап, басынан ауыр жарақат алған, деп хабарлайды Zakon.kz.

Қалалық аурухана дәрігерлері баланың қазіргі жағдайынан хабардар етті.

Оған ашық бас сүйек-ми жарақаты, бас сүйегі сынған, миынан қатты соққы алған деген диагноз қойылды. Қазір бала жасанды тыныс алу аппаратында жатыр, облыстық балалар ауруханасы мамандарының кеңесін күтіп отырмыз. Баланың жағдайы тұрақты, – дейді Рудный қалалық көпсалалы ауруханасының дәрігерлері.

Дәрігерлер жазда балалар жиі жарақат алатынын еске салды:

Құрметті ата-аналар, балаларды қараусыз қалдырмаңыздар, олармен аулада, ойын алаңында, жолдарда қауіпсіз тәртіпке қатысты профилактикалық әңгімелер жүргізіңіздер, – делінген хабарламада.

ҚР ДСМ Ұлттық Қоғамдық денсаулық сақтау орталығының Инфекциялық емес аурулардың профилактикасы департаментінің бас маманы Қуаныш Әлімбетов жазда жоғары температура, ашық терезелер және басқа да себептермен жарақат алу қаупі артқан кезде балаларды қалай сақтандыру керек екенін айтып берді.