«Әдейі жамандайтын лоббистер бар»: Елімізде бірнеше атом электр станциясы салынбақ

Энергетика министрі Алмасадам Сәтқалиев елімізде бір емес, бірнеше атом электр станциясын салу жоспарлануда. Сондай-ақ министр соңғы шешім қазақстандықтардың еншісінде екенін айтты,  деп хабарлайды Skifnews.kz ақпарат порталы.

КТК телеарнасының мәліметінше, Алмасадам Сәтқалиев мәселе Қазақстанда бір ғана АЭС салуда емес, Қазақстанда атом энергетика саласының дамуында екенін алға тартқан.

«Әлем бойынша атом энергетикасы энергетикалық жүктемелерді жабудың ең перспективалы түрі ретінде ұсынылған. Қазақстанда АЭС құрылысын жүргізуге болатын бірнеше тиімді учаскелер бар», – деді министр.

Энергетика министрлігінің мамандары мен мемлекеттік қызметкерлер қазақстандықтармен кездесіп, атом электр станциясын салудың пайдасы туралы айтып, тамыз айының соңына дейін түсіндіру жұмыстарын жүргізеді. Сол кезде референдумның өтетін уақыты да белгілі болмақ.

Бұған дейін Алмасадам Сәтқалиев Қазақстанның солтүстігіне, оңтүстігіне және батысына кемінде үш атом электр станциясы қажет деген еді.

Сондай-ақ министр Қазақстанда атом электр станциясын салу мәселесіне қатысты тағы бір ойын жеткізді.

«Жобаны жүзеге асыратын шетелдік компанияларды әдейі жамандайтын лоббистер тобы бар. Атом электр станциясын салу мәселесін қараған кезде эмоцияға берілмеу керек. Өйткені ядролық технологиялардың қауіпсіздік деңгейі қазір ең жоғары деңгейде», – деді Алмасадам Сәтқалиев.