Желіде құрылысына 815 млн теңге жұмсалған қыздар дәретханасы талқыға түсті

Желіде Ақтөбедегі гимназиядағы есігі жоқ қыздар дәретханасының суреті пайда болды. Бұған қатысты мектеп әкімшілігі түсініктеме берді, деп хабарлайды Skifnews.kz ақпарат порталы Nur.kz-ке сілтеме жасап.

 Жазба Instagram желісіндегі Aqtobe_sergek парақшасында пайда болды. Фотосуретте арасы бөлінген, бірақ есіктері жоқ екі дәретхана бар.

"Мектеп-гимназияға жаңа ғимарат қосылды, бұл балалардың заманауи ғимаратта оқитыны өте қуантады, бірақ мектеп әкімшілігінің байқамай отырған мәселесі – дәретхана. Атап айтқанда, есігі жоқ қыздарға арналған дәретхана. Неліктен қыздарға мұндай қарым-қатынас жасалды, олардың қажеттілігіне неліктен құрметсіздік көрсетілген? Мұндайды қалай жобалап, қолданысқа беруге болады?", - делінген жазбада.

Жазбаны көрген қазақстандықтар түрлі пікір қалдырған. Олардың көпшілігі мұның дұрыс еместігін баса айтқан. Пікір жазғандар қатарында мектеп әкімшілігінің өкілдері де бар. Олар жағдайға қатысты түсініктеме берген.

 "№2 мектеп-гимназиясының әкімшілігі мектептің қосымша ғимараты жақында ғана пайдалануға берілгенін хабарлады. Алдағы уақытта аталған мәселе шешілетін болады", - делінген хабарда.

Сонымен қатар қадағалаушы ведомство да жазбаға пікір білдірген. Олар өтініш Ақтөбе облысы Ахуалдық орталығында тіркеліп, құзыретті ұйымның қарауына жіберілгені айтылған.

 Ал, HALYQSTAN Telegram-арнасының мәліметінше, құрылыс жұмыстарына 815 миллион теңге жұмсалған. Қосымша ғимараттың құрылысы өткен жылы басталып, ғимарат биыл пайдалануға берілген.