Семейде мұғалім биіктен құлады: «Педагог мәртебесі» туралы заң неге сақталмайды

Семейде шыршаны безендіру кезінде мұғалім биіктіктен құлап зардап шекті. Оқу-ағарту министрі Ғани Бейсембаев жағдайға байланысты пікір білдіріп, ұстаздарды міндетіне кірмейтін қызметке жұмсауға болмайтынын ескертті, деп хабарлайды Skifnews.kz ақпарат порталы.

Министр өзінің Facebook парақшасында хабарлама жазып, Қазақстан заңнамасын сақтау қажеттігін еске салды.

«Семей қаласында мұғалімдерді жаңажылдық шыршаны безендіруге тарту және әріптесіміздің осы іс барысында жарақат алуы – заң бұзушылықтың айқын көрінісі.

Педагогтерді кәсіби міндеттеріне жатпайтын мұндай жұмыстарға тарту – «Педагог мәртебесі туралы» заңды өрескел бұзу деп санаймын. Бұл оқиғаға байланысты облыс басшылығы әділ әрі жан-жақты тексеру жүргізіп, алдағы уақытта мұндай келеңсіздіктердің қайталануына жол бермеу үшін тиісті шаралар қабылдайды деп үміттенемін», – деді ол.

Министр білім басқармалары мен бөлім басшыларына заң талаптарын қатаң орындауға ерекше назар аударуды ескертті.

«Қуат Айтқалиевтің отбасына шынайы қолдау білдіре отырып, оның тезірек сауығуын тілеймін. Қазіргі уақытта оған барлық қажетті медициналық көмек көрсетіліп жатыр. Бұл жағдай ерекше бақылауға алынды», – деп қосты министр.

Шыршаны безендіруге мұғалімдер заңсыз тартылды: Семей қалалық білім бөлімінің басшысы қызметінен босатылды

Жаңа жылдық шыршаны безендіруге заңсыз араласуға қатысты оқиғадан кейін Семей қалалық білім бөлімінің басшысы қызметінен босатылды, деп хабарлайды Абай аудандық білім басқармасының баспасөз қызметі.

«Ішкі тексеру қорытындысы бойынша Семей қаласындағы үш мектептің мұғалімдері жаңа жылдық шыршаны безендіруге заңсыз қатысқаны анықталды. Олардың арасында жарақат алған No49 мектептің қазақ тілі мен әдебиеті пәнінің мұғалімі Қуат Айтқалиев те бар.Тексеру нәтижесінде Семей қаласындағы үш мектеп директорына қатаң сөгіс жарияланып, қалалық білім бөлімінің басшысы қызметінен босатылды», - деп хабарлады баспасөз қызметі.

Сондай-ақ, алдағы уақытта мұндай жағдайлардың алдын алу үшін барлық білім беру ұйымдарына заң талаптарын мүлтіксіз орындау тапсырылып, бақылау күшейтілмек.

«Жағдай Қазақстан Республикасының «Педагог мәртебесі туралы» заңын бұзады, оған сәйкес мұғалімдерді кәсіби міндеттеріне байланысты емес жұмысқа тартуға тыйым салынады. Қазіргі уақытта зардап шеккен мұғалімге барлық қажетті медициналық көмек көрсетілуде. Бұл мәселе облыс басшылығының ерекше бақылауында», - деп сендірді департаменттегілер.

Бұған дейін Білім министрі Ғани Бейсембаев өзінің Facebook парақшасында Семейде жаңа жылдық шыршаны безендіруге мұғалімдер тартылып, салдарынан олардың бірі зардап шеккенін хабарлаған болатын.

Дәрігер мұғалімнің өлім кетуі мүмкін екенін айтты

Бұған дейін Білім министрі Ғани Бейсембаев өзінің Facebook парақшасында Семейде жаңа жылдық шыршаны безендіруге мұғалімдер тартылып, салдарынан олардың бірі зардап шеккенін хабарлаған.

Семейде бас шыршаны безендіру кезінде зардап шеккен мұғаліммен болған оқиғаның қорқынышты мәліметтері белгілі болды.

Шенеуніктердің айтуынша, түскен бойда жас жігітке шұғыл ота жасалған. Бас сүйегінің ақауын түзету үшін болашақта оған тағы бір ота қажет болады. Қазір жәбірленуші жансақтау бөлімінен жалпы палатаға ауыстырылды.

Нейрохирург Рашид Ишмұхаметовтің айтуынша, науқас жарақат алғаннан кейін бір сағаттан соң медициналық мекемеге түскен. Жағдай өмірге қауіпті болды. Кезекші дәрігер тез арада компьютерлік томографияға түсіріп, нәтижелерін алып, желіде жедел талқылаудан кейін мамандар шұғыл ота жасау қажет деп шешкен.

«Науқастың жағдайы айтарлықтай жақсарды, ол қазірдің өзінде жақсы нәтижеге ие жарақат нәтижесінде тамыр жарылып, бассүйек қуысында қан біртіндеп жиналады. Әңгіме – гематома үлкен мөлшерге жетіп, өмірге қауіп төндірмей тұрып, операция жасауға үлгеру», – дейді нейрохирург Рашид Ишмұхаметов.

Дәрігер түсіндіргендей, операция кезінде жарақат алған мұғалімнің өмір сүру мүмкіндігін арттыру үшін бас сүйегінің гематома пайда болған бөлігін алып тастаған. Болашақта оған бас сүйек ақауын жою үшін 2-3 айдан кейін тағы бір операция қажет болады.

«Бұл қазірдің өзінде жоспарланған процедура. Жас жігіттің жасағаны жөн, өйткені бас сүйегінің бір бөлігінің болмауы кездейсоқ жарақат алу қаупін тудырады. Қалпына келтіру 1,5 - 2 айға созылады. Адамға өтемақы төлеу керек: Оның басында жара бар, тігістерді алып тастау керек. Әзірге нақты шығарылатын күні жоқ, ол жас, оның жазылу мүмкіндігі жоғары», - деді нейрохирург Рашид Ишмұхаметов.

«Әкімдіктің шыршасына бейшара мұғалімдерді жұмсайды»

Фото: зардап шеккен мұғалімнің әйелі \ видеодан алынды

Семейде жаңажылдық шыршаны безендіру кезінде зардап шеккен Қуат Айтқалиев есімді мұғалімнің жары оқиғаға пікір білдірді.

Шырша безендіру кезінде биіктен құлаған №49 мектептің қазақ тілі мен әдебиеті пәнінің мұғалімі Қуат Айтқалиевтің жары Сымбат Аянқызы да мектеп мұғалімі. Ол оқиғаның қалай болғанын баяндады.

«Оқиғадан бір күн бұрын күйеуіме досы хабарласты. «Таңғы сағат 9-да шырша құруға барасыңдар» деген бұйрық келген. Ертесі күні 9 жарымда сол жерде болған. Безендіру кезінде 4 метр биіктіктен құлаған. Оқиға орнына бірден жеттім. Мен келсем операцияға алып кеткен екен. Жағдайын өте ауыр деп бағалады дәрігерлер. Олардың сөзінше, жолдасымның бас сүйегі сынған», - деді мұғалімнің жары Massaget-ке берген сұхбатында.

Сымбат Аянқызы оқыс оқиғадан зардап шеккен жолдасының бұл жағдайына білім бөлімінен бөлек, әкімдік те кінәлі деп санайды. Оның айтуынша, Қуат Айтқалиев құруға барған шырша әкімдіктің шыршасы.

«Бұл педагогтың кәсіби құзыреттілігіне кірмейтін шаруа. Бұған тек білім бөлімі ғана емес, әкімдік те кінәлі. Әкімдік тікелей білім бөліміне бұйрық берген. Бұл – әкімдіктің шыршасы. Оған апарып бейшара мұғалімдерді жұмсайды. Жолдасымның жағдайы қалай болатынын білмеймін. Бірақ бұл өте ауыр жағдай», - деді ол.

Әйелінің сөзінше ол шырша құруға өз еркімен бармаған. Оған басшылықтан бұйрық келіп, сол бұйрықты орындауға кеткен дейді.

«Ол шыршаға аяғымен кәдімгідей шыққан. Көбі айтып жатыр ғой, өз еркімен келді деп. Жоқ, ол өз еркімен барған жоқ. Оларға барыңдар деп айтты. Солай ол барды. Сенбі күні жұмысқа шыққаны үшін қосымша ақша төлейді деп ештеңе айтпаған да. Директор айтты деп барды», - деп жауап берді мұғалімнің жары Сымбат Аянқызы.

Асхат Аймағамбетов Семейдегі мұғалім оқиғасына қатысты пікір білдірді

Бұрынғы білім министрі, қазір мәжіліс депутаты қызметін атқаратын Асхат Аймағамбетов өзінің Telegram-дағы арнасында Семейдегі мектеп мұғалімімен болған оқиғаға қатысты пікірін ашық айтты.

Таяуда Семей қаласында мұғалімдерді жаңажылдық шыршаны орнатуға тартып, соның салдарынан бір мұғалімнің ауыр жарақат алғаны белгілі болды. Аймағамбетов мұндай жағдайды жай ғана «жаңсақтық» деп қарастыруға болмайтынын айтып, «Педагог мәртебесі туралы» заңның 6-бабында нақты көрсетілгендей: мұғалімдерді кәсіби міндеттеріне жатпайтын жұмыстарға тартуға қатаң тыйым салынатын еске салды.

«Жаңа жылдық шырша орнату, көше тазалау, басқа да науқандарға мәжбүрлеп тарту сияқты ескі «дәстүрлерден» біржола бас тартуымыз керек. Бұл – заңды өрескел бұзу», - деді ол жазбасында.

Оның айтуынша, осы оқиға бойынша нақты мынадай шараларды қолға алу қажет:

1. Облыс басшылығы бұл жағдайды мұқият тергеп, жауапты тұлғаларды жазалауға тиіс.

2. Мұғалімдерге тікелей міндетіне жатпайтын жұмыстарға тартуды тоқтату үшін министрлік бақылауды күшейтуі қажет.

3. Білім басқармалары мен мектеп әкімшіліктері мұғалімдердің құқықтарын қатаң сақтау бойынша міндеттерін орындауға тиіс.

«Мемлекет басшысы әрдайым мұғалімдердің мәртебесін қорғау мен олардың құқықтарын сақтау мәселесін ерекше назарда ұстап келеді. Біздің міндетіміз – сол талаптарды орындап, заңның жұмыс істеуін қамтамасыз ету. Министрліктің бұл мәселені бақылауға алғаны – үміт береді. Жарақат алған әріптесімізге тезірек сауығып кетуін тілеймін», - деп түйіндеді бұрынғы министр.

«Мұғалімдерді мүсәпір емес, мәртебелі етейікші»

Фото: Армангүл Тоқтамұрат\facebook.com

Семейдегі мұғалімнің зардап шегуіне байланысты танымал журналист Армангүл Тоқтамұрат та пікір білдірді.

Тележүргізуші өткір пікірін желідегі парақшасында жазды.

«Есеп деп қағазға көмдік, үлкен науқандарға жұмылдырдық, массовкаға пайдаландық енді, шырша безендіртіп қойдық. Ұстаздың міндеті бала оқыту емес пе еді?!

Семейде орталық алаңда №49 мектептің мұғалімі Қуат Айтқалиев шырша құрып жатып, 5 метр биіктіктен құлаған. Бас сүйегі сынып, миына зақым келген. Қазір ауруханада жатыр. Жары Сымбаттың сөзінше, сенбі күні сағат 9-да шығарған шырша құруға. Қағаз жүзінде ешқандай бұйрық болмаған.

Қызметтік тексеріс жүргізілген. Нәтижесінде, аталған қайшылыққа жол берген 3 мектептің директорына қатаң тәртіптік жаза қолданылды. Семей қаласы білім бөлімінің басшысы қызметінен босатылды. Ал қаланың бас шыршасын орнатуға 25 миллион теңге бөлініпті. Әкімдіктегілердің айтуынша, ол жасанды желекті сатып алуға жұмсалған. Ал шыршаны волонтерлер құруы тиіс болыпты. Оның орнына мұғалімдерді міндеттеп, жұмысты дұрыс ұйымдастырмаған қала әкімінің орынбасары да қатаң сөгіс алды.

Енді осы дұрыс па? Мұғалімді анда да, мында да жегіп, қара жұмысшы күші ретінде пайдалануды қою керек. Мүсәпір емес, мәртебелі етейікші! Қоғам сыйламаған ұстазды бала тыңдасын ба? Ал, тыңдамаған баладан білімді, тәрбиелі адам шыға ма?!», — деп жазды ол.

Ұстаз өмір бойы төлем алуы мүмкін

Парламент Мәжілісінің депутаттары, AMANAT партиясы фракциясының мүшелері Семейдегі жағдайға байланысты Бас прокурор Берік Асыловқа депутаттық сауал жолдады.

Депутат Жұлдыз Сүлейменова 21 желтоқсанда №49 мектептің мұғалімі Қуат Айтқалиев Семей қаласының орталық алаңында жаңажылдық шыршаны безендіру кезінде биіктіктен құлап, ауыр жарақат алғанын, қазірг жағдайы өте ауыр екенін еске салды.

«Мемлекет басшысы Қасым-Жомарт Тоқаевтың тапсырмасымен қабылданған «Педагог мәртебесі туралы» заң ұстаздардың заңды мүддесі мен құқықтарын қорғауға арналған. Бұл заң мұғалімдердің негізгі қызметіне жатпайтын артық міндеттерден қорғауы шарт. Алайда осы жағдай «Педагог мәртебесі туралы» заңды өрескел бұзып тұр», - деп мәлімдеді Сүлейменова.

Осыған байланысты AMANAT партиясы фракциясының мүшелері бас прокурордан мұғалімдерді заңсыз жұмысқа тарту шешімін қабылдаған және «Педагог мәртебесі туралы» заңды бұзған тұлғаларды анықтап, қатаң жауапкершілікке тартуды сұрады.

«Бүгінгі таңда мектеп директорлары мен білім бөлімінің басшылары ғана жауапкершілікке тартылған. Бұл әділетсіз және қисынсыз деп санаймыз. Сондықтан да осы шешімді берген барлық тұлға анықталып, жауапкершілікке тартылсын. Зардап шеккен мұғалімге толық медициналық көмек көрсетуді және заңды өтемақы төлеуді, оның ішінде педагогтың алған жарақатын өндірістік жарақат деп тануды және оған өмір бойы өндірістік жарақатқа берілетін төлемді тағайындауды қарастыруды сұраймыз», - деді Мәжіліс депутаты.

Сондай-ақ депутатар бүкіл облыстағы барлық орта мектепте тексеріс жүргізіп, мұғалімдердің құқықтары мен қауіпсіздігін қамтамасыз ету бойынша қосымша шаралар қабылдауды ұсынды.

«AMANAT партиясы фракциясы Қазақстанның Бас прокуратурасынан осы мәселені жеке бақылауға алып, кінәлілерді жауапқа тартып және зардап шеккен жағдайы ауыр педагогтың құқықтарын толық қорғауды қамтамасыз етуде нақты шаралар қабылдауды сұраймыз», - деп түйіндеді сөзін Сүлейменова.

Еске салсақ, бұған дейін оқу-ағарту министрі Ғани Бейсембаев өзінің Семейде болған оқиғаны – ұстаздың жаңажылдық шыршаны безендіру кезінде жарақат алуын «өрескел заңбұзушылық» деп, облыс басшылығына істі тексеруді тапсырды.