Қытайдағы жер сілкінісі: қаза тапқандар саны 126-ға жетті

Қытайдың оңтүстік-батысындағы Тибет автономиялық ауданында болған 6,8 балдық жер сілкінісінен қаза тапқандардың саны өсіп, 126 адамға жетті, деп хабарлайды Skifnews.kz ақпарат порталы.

Синьхуа агенттігінің мәліметінше, табиғи апат салдарынан 188 адам түрлі жарақат алған, олардың кейбірінің жағдайы ауыр. Жер сілкінісі сейсенбі күні таңертең болған, ал жергілікті уақыт бойынша кешкі сағат 19:00-де құтқару жұмыстарын жүргізіп жатқан қызметтер жағдайды бақылап отыр.

Еске салсақ, бүгін таңертең Қытайдың Тибет автономиялық ауданында, Непал шекарасына жақын маңда магнитудасы 7,1 баллдық жер сілкінісі болған еді. Ошағы шамамен 10 шақырым тереңдікте орналасқан зілзала алғашқы сағаттарда 53 адамның өмірін қиғаны туралы хабарланған. Кейінірек бұл көрсеткіш тағы да өсті. Жарақат алғандардың арасында ауыр халде жатқан адамдар да бар. Қазақстан Президенті Қасым-Жомарт Тоқаев Қытай Халық Республикасының Төрағасы Си Цзиньпинге көңіл айту жеделхатын жолдады.