Шымкентте антикор қызметкері пара алған

Жемқорлықпен күресуі тиіс болған антикор қызметкерінің өзі пара алған. Шымкенттік экс-шенеуніктің заңсыз ақша алғаны сотта толық дәлелденіп, 11 жылға темір торға тоғытылды, – деп хабарлайды Skifnews.kz ақпарат порталы Almaty.tv-ге сілтеме жасап.

Бұған дейін антикордың бұрынғы қызметкері Дәуренбек Қожабаевқа 41 млн теңге пара алды деген айып тағылған болатын. Экс-шенеунік кінәсін мүлдем мойындамай, өзін ақтауды сұрағанымен, жазаға тартылды.

 «Қожабаев Дәуренбек Қылмыстық кодекстің 366-бабы 4-бөлігімен кінәлі деп танылып, 11 жылға бас бостандығынан айырылсын! Сонымен қатар өмір бойына мемлекеттік қызметте лауазымды қызмет атқару құқығынан айырылады. Оған жазасын қылмыстық-атқару жүйесінің орташа қауіпсіз мекемелерінде өтеу белгіленсін. Қожабаев сыбайлас жемқорлыққа қарсы қызмет полковнигі арнайы атағынан да қол үзеді. Сондай-ақ 41 млн теңге көлемінде қаржыны мемлекетке қайтаруға міндеттелді», – деді судья Әбинур Қарабаев.

Сот мәліметіне сүйенсек, Дәуренбек Қожабаев мектеп директорын «қылмыстық жауапкершіліктен босатамын» деп, ірі көлемде пара талап еткен. Ал қаражатты тауып берген білім ұясының басшысы тергеу барысында өз-өзіне қол салыпты. Марқұмның отбасы бұған экс-шенеунікті кінәлап, үкіммен келіспейтінін жеткізді.

 «Мектеп директоры болып орныңда қаласың, ешкім білмейді» деп уәде берген. Ақшаны алды да, жоқ боп кетті», – деді марқұмның туысы Зубайра Каштанова.

Еске сала кетейік, қалалық Сыбайлас жемқорлыққа қарсы іс-қимыл агенттігі бастығының экс-орынбасары былтыр 30 қарашада пара алды деген күдікпен ұсталған. Дегенмен Қожабаев тергеуден жасырынып, оған халықаралық іздеу жарияланып үлгерген. Жедел-іздестіру іс-шараларының нәтижесінде ол Түркістан облысында қолға түсті.