Павлодарда оқушы мұғалімді тұншықтырмақ болды

Павлодардағы №11 мектепте күзгі бал кезінде мұғалім мен оқушы арасында жанжал туындады, деп хабарлайды Skifnews.kz ақпарат порталы.

Оқиға туралы ақпарат Telegram-арнада жарияланған. Белгілі болғандай, акт залында өткен шара барысында мұғалімнің ескертуінен кейін 9-сынып оқушысы әйел ұстазды мойнынан қысып, біраз уақыт бойы тұншықтырған. Кейін оқушы мұғалімді жіберіп, залдан шығып кеткен.

– №11 мектепте болған оқиғаны растаймыз. Құқық қорғау органдары ата-анаға қатысты әкімшілік хаттама толтырды, іс материалдары сотқа жолданды, – деп хабарлады Павлодар қалалық білім бөлімі.

Ақпаратты Павлодар облыстық полиция департаменті де растады.

Ведомствоның мәліметінше, оқиғаға байланысты тексеру жүргізілген, ал оқушының әрекеті кәмелетке толмағандар ісі жөніндегі комиссияда қаралатын болады.