Конституциядан Үкіметтің кейбір өкілеттіктері алынып тасталады

Конституциядан Үкіметтің кейбір өкілеттіктері алынып тасталады. Бұл туралы Конституциялық реформалар жөніндегі комиссияның екінші отырысында Әділет министрі Ерлан Сәрсембаев айтты, деп хабарлайды Sn.kz ақпарат порталы. 

- Констиуцияның 5-бөліміндегі Үкіметтің функцияларын айқындайтын тиісті бапта мемлекеттік бағдарламаларды бекітуге, сондай-ақ мемлекеттік комитеттерге қатысты өкілеттіктерді, атап айтқанда олардың қызметіне басшылық жасау және актілердің қолданылуын жою немесе тоқтата тұру өкілеттіктерін алып тастау ұсынылады, - деді Ерлан Сәрсембаев.

Оның атап өтуінше, мемлекеттік жоспарлаудың жаңа жүйесіне сәйкес, мемлекеттік бағдарламалар бұл жүйенің құжаттары болып табылмайды.

- Мұндай бағдарламалар қажеттігіне қарай әзірленіп, бекітілетін болады. Қазіргі уақытта атқарушы билік құрылымындағы комитеттер орталық атқарушы органның ведомствосы болып саналады. Осыған байланысты оларды Конституцияда жеке атап өтудің орындылығы жоқ,- деді министр.