Қазір аулаға жиналған су көбеймесе азаймай тұр.
Семей қаласындағы Комсомол кентінде қар суы мен жаңбыр суы тұрғын үйлердің ауласына жиналып, халықтың жүріп-тұруына кедергі келтіріп отыр. Янушкевич көшесі, 23/1 мекенжайында түсірілген видеода аула ішін су басып, тұрғындардың үйден шығуы қиындағаны көрінеді. Тұрғындардың айтуынша, мәселе жолға жаңа асфальт төселгеннен кейін басталған. Жол деңгейі ауладан биік болып кеткендіктен, барлық еріген қар мен жаңбыр суы тікелей үйлердің маңына жиналады. Алайда бұл жерде су ағатын арнайы арық та, құбыр да қарастырылмаған. Салдарынан адамдар жұмысқа бару үшін де, балаларын мектепке апару үшін де суды кешіп өтуге мәжбүр. Тұрғындар мәселені өз күшімізбен шешейік десе, жолды бұзуға болмайды деп ескерту жасалғанын айтады. Жергілікті халық бұл жағдайға қала әкімдігі мен коммуналдық қызметтердің салғырттығын кінәлап отыр. Олардың сөзінше, жол салынғанда су бұру жүйесі мүлде ойластырылмаған, ал шағым айтылғанымен мәселе әлі шешілмеген. Қазір аулаға жиналған су көбеймесе азаймай тұр. Тұрғындар әкімдіктен сапасыз жасалған жұмысты тексеріп, су ағызатын жүйені шұғыл түрде жасауды талап етеді. Видео: oo_osa_semey_vko