Терроризмге қарсы іс-қимыл – ұлттық қауіпсіздіктің басты бағыты

Қазіргі жаһандану дәуірінде терроризмге қарсы күрес мемлекеттердің стратегиялық басымдықтарының біріне айналды. Бұл қауіп тек әскери немесе құқық қорғау саласына ғана емес, қоғамның рухани тұрақтылығы мен ақпараттық кеңістігіне де әсер етуде. Террористік идеология көбіне әлеуметтік теңсіздік, жалған діни түсінік немесе интернет арқылы таралатын деструктивті насихат негізінде қалыптасатыны белгілі. Сондықтан алдын алу шаралары кешенді сипатта жүргізілуі тиіс.

Ұлттық қауіпсіздік комитетінің төрағасы Ермек Сағымбаев терроризмнің заманауи сипат алып келе жатқанын атап өтті. Оның айтуынша, дәстүрлі қауіп-қатерлер қатарында халықаралық терроризм мен діни экстремизм, заңсыз көші-қон, трансұлттық қылмыс және есірткі бизнесі сақталып отыр. Сонымен қатар цифрлық технологиялардың жаппай таралуы, жасанды интеллект құралдарының қылмыстық топтар тарапынан пайдаланылуы жаңа сын-қатерлерді туындатуда. Геосаяси жағдайдың тұрақсыздығы да қауіпсіздік мәселесіне тікелей ықпал етеді.

Сарапшылардың пікірінше, халықаралық діни терроризм проблемасы өзектілігін жоғалтқан жоқ. Кейбір азаматтар теріс идеологиялық ықпалға түсіп, радикалды ағымдардың құрығына ілігуде. Мәселен, өткен жылы Ақтөбе, Атырау облыстары мен Шымкент қаласында терроризмді насихаттау, адамдарды террористік әрекетке тарту және заңсыз қару сақтау фактілері бойынша бірқатар тұрғындар сот шешімімен кінәлі деп танылып, түрлі мерзімге бас бостандығынан айырылды. Соңғы алты айда осындай қылмыстарға байланысты ондаған адам ұсталып, алпыстан астамы сотталған.

Мамандар терроризмге қарсы тиімді күрес тек күштік құрылымдардың әрекетімен шектелмейтінін айтады. Бұл бағытта қоғамның құқықтық сауаттылығын арттыру, жастардың діни және ақпараттық мәдениетін күшейту, әлеуметтік әділеттілікті қамтамасыз ету маңызды рөл атқарады. Терроризмнің алдын алу – мемлекеттің ғана емес, бүкіл қоғамның ортақ міндеті.