Жанабыловтар ісі: сот қылмыстық істі прокуратураға қайтарудан бас тартты

Астанада блогерлер Ерболат Жанабылов пен Эльмира Төлегеноваға қатысты қылмыстық іс бойынша алдын ала сот тыңдауы өтті. Сот отырысында қорғаушы тарап істі прокуратураға қайтаруды сұрағанымен, судья бұл өтінішті қанағаттандырмады.

Блогерлердің адвокаты Гаухар Айтжанова қылмыстық-процессуалдық нормалардың бұзылғанын алға тартып, істі тоқтату үшін материалдарды прокурорға қайта жолдауды сұрады. Оның айтуынша, алдын ала тергеу кезінде бірқатар рәсімдер сақталмаған.

Алайда мемлекеттік айыптаушы Карина Аманжолованың сөзінше, іс материалдарында жеткілікті дәлелдер бар және олар Қылмыстық кодекстің 214 және 218-баптарында көзделген құқықбұзушылық белгілерін көрсетеді. Прокурордың пікірінше, сараптама қорытындылары, қаржылық құжаттар мен процессуалдық әрекеттердің нәтижелері істі сотта қарауға толық негіз береді.

Істі қарап жатқан судья Әділбек Баймаханов қорғаушының өтінішін қарастырып, қылмыстық істі прокуратураға қайтаруға заңды негіз жоқ деген шешім шығарды. Осылайша іс сотта қаралуын жалғастырады.

Еске салайық, блогерлерге заңсыз қаржы операцияларын ұйымдастырды деген күдікпен Қылмыстық кодекстің 214 және 218-баптары бойынша айып тағылған. Негізгі сот талқылауы алдағы күндері өтеді.