Тоқаев бірқатар маңызды заңға қол қойды

Мемлекет басшысы «Қазақстан Республикасының Үкіметі мен Аустрия Республикасының Федералдық Үкіметі арасындағы заңсыз жүрген адамдарды реадмиссиялау және транзиттеу туралы келісімді ратификациялау туралы» Қазақстан Республикасының Заңына қол қойды, деп хабарлайды Sn.kz ақпарат порталы.

Бұл туралы Ақорда баспасөз қызметі мәлімдеді.

Заңның мәтіні баспасөзде жарияланады.

Сонымен қатар, Мемлекет басшысы «Қазақстан Республикасы Президентінің жанындағы Отбасы мәселелері жөніндегі уәкіл институтын құру туралы» Жарлыққа қол қойды.

— Қазақстан Республикасында адам құқықтарын қорғауды күшейту, отбасы институтын нығайту және мемлекеттік отбасылық саясатты жетілдіру мақсатында Қазақстан Республикасы Президентінің жанындағы Отбасы мәселелері жөніндегі уәкіл институтын (бұдан әрі — Уәкіл) құруды қаулы етемін, ол өз қызметін Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссия құрамында төрағаның орынбасары ретінде қоғамдық негізде жүзеге асырады. Уәкілдің негізгі мақсаттары отбасы құқықтары мен мүдделерін қорғауды күшейту, отбасы институтын және дәстүрлі отбасылық құндылықтарды нығайту, мемлекеттік отбасылық және демографиялық саясатты жетілдіру, отбасылық-тұрмыстық зорлық-зомбылықтың алдын алу, сондай-ақ қазақстандық отбасылардың әл-ауқатына жәрдемдесу болып белгіленсін, — делінген құжатта.

Қазақстан Республикасының Үкіметіне осы Жарлықтан туындайтын шараларды қабылдау тапсырылды. Ал осы Жарлықтың орындалуын Қазақстан Республикасы Президентінің Әкімшілігі бақылайды. Жарлық қол қойылған күнінен бастап қолданысқа енгізіледі.