«Кірпіштер арасында құрылыс қоспасы болмаған»: Ұлдана Мырзуан ісінде куәгерден жауап алынды

Астанада фельдшер Ұлдана Мырзуанның қазасына қатысты сот процесі жалғасып жатыр. Сот отырысында кезекті куәгер Константин Костенко жауап берді, деп хабарлайды Sn.kz ақпарат порталы. 

Константин Костенконың айтуынша, ғимарат құлаған кезде өзі тоғызыншы қабаттағы пәтерінде болған. Дауыс естіп, сыртқа көтерілген шаңды көрген соң, бірден көшеге шыққан.

Куәгердің сөзінше, ол кезде оқиға орнына жедел жәрдем бригадасы келіп үлгерген. Бірнеше минуттан кейін құтқарушылар да жеткен. Сотта куәгер ғимараттың қасбетінің жағдайына қатысты да пікір білдірді. Оның айтуынша, қабырғаның кейбір бөліктерінде кірпіш арасындағы құрылыс қоспасының жоқтығы көзге түскен.

Сонымен қатар куәгер қаза болған фельдшердің үстіне кондиционердің сыртқы блогы құлағанын айтты. Алайда соттың нақтылау сұрақтарынан кейін ол бұл сәтті өз көзімен көрмегенін, яғни оқиғаға тікелей куә болмағанын мойындады. Сот куәгерге жалған ақпарат бергені үшін заңда жауапкершілік қарастырылғанын ескертті.