«Бауырлас халықпыз»: әзербайжандықтар іздеу жұмыстарына қолдау көрсетіп жатыр (ВИДЕО)

Маңғыстау облысында Каспий теңізінің жағалауында әскери қызметшілерді іздеу жұмыстарына қатысып жатқан азаматтарға әзербайжан диаспорасының өкілдері көмек көрсетті, деп хабарлайды Sn.kz ақпарат порталы Ulysmedia.kz-ке сілтеме жасап.

Ақтауда тұратын әзербайжандықтар іздеу орнына азық-түлік пен ауызсу жеткізген. «Достлуг» диаспорасының өкілі Эльмир Шахсуваров олардың қайғылы жағдай туралы естіген бойда қол ұшын беруге келгенін айтты.

— Біз Ақтауда тұрып, еңбек етіп жүрміз. Сондықтан шетте қала алмадық. Әзербайжандықтар жиналып, әркім қолынан келгенше көмектесіп жатыр. Азық-түлік пен су әкелдік. Барлық қаза тапқан әскери қызметшілер табылғанға дейін осында боламыз. Біз — бауырлас халықпыз, бір-бірімізге қолдау көрсетуіміз керек, — деді ол.

Эльмир Шахсуваров Ақтау маңында AZAL ұшағы апатқа ұшыраған кезде қазақстандықтардың көрсеткен көмегін де еске алды. Алайда ол қазіргі қолдау бұрынғы жақсылықтың қарымтасы емес екенін атап өтті.

— Бұл тек AZAL ұшағына көрсетілген көмек үшін жасалып жатқан жоқ. Біз осында тұрып, жұмыс істейміз. Сондықтан көмектесуге міндеттіміз, — деді диаспора өкілі.