Шымкентте қоғамдық автобус жол ортасында өртеніп кетті

Шымкентте Жібек жолы көшесінің бойында жолаушылар автобусы өртеніп кетті. Бұл туралы ОҚО ІІД баспасөз қызметі хабарлап отыр.

Ішкі істер департаменті Шұғыл басқару орталығының мамандары көшедегі бейнебақылау камерасынан сағат 10:50 шамасында автобустың тұтанғанын байқап қалған және тез арада өрт сөндірушілерді шақырған. Оқиға орнына сондай-ақ, жергілікті полиция қызметінің экипажы да жетіп, өртті сөндіруге көмектесіпті.

Кейінірек анықталғандай, 22-бағытта қатынайтын қытайлық «Шаулинь» автобусы жүріп келе жатып тұтанған екен. Сол сәтте автобус салонында екі жолаушы мен жүргізуші және кондуктор болған. Жараланғандар жоқ. Тек автобус иесіне айтарлықтай материалдық шығын келді.