Қостанайда автовокзалда баласын тастап кеткен әйел Астанада ұсталды

Полицияда баланың анасын табу мақсатында жедел топ құрылып, 10 күн бойы іздеу жүргізілді.

Қостанай қаласы ІІБ қызметкерлері елордалық әріптестерімен бірге 17 маусым күні баласын автовокзалға тастап кеткен 22 жастағы әйелді Астанада ұстады деп хабарлады қалалық ІІД баспасөз қызметі.

Естеріңізге сала кетейік, 17 маусым күні полицияға Қостанай тұрғыны хабарласып, облыс орталығының автовокзалынан бір жарым жастағы бала табылғанын айтқан. Бала медициналық тексерістен өтуі үшін облыстық балалар ауруханасының қабылдау бөлмесіне жеткізіліп, кейінірек «Дельфин» балалар үйіне орналастырылды.

Баланың анасын табу мақсатында полицияда жедел топ құрылып, 10 күн бойы іздеу жүргізілді. Іздеу шаралары барысында әйел Астана қаласында екені анықталды. Күдіктіге қатысты «Қауіп-қатерде қалдыру» бабы бойынша сотқа дейінгі тергеу жүргізіліп жатыр.

Дереккөз: Sputniknews.kz