$ 444.22 € 476.38 ₽ 4.82
Ақтөбенің 23 жастағы тұрғыны Анатолий Гекк осыдан 16 жыл бұрын жоғалып кеткен қарындасына іздеу салған. Темір тордың арғы жағында отырған азаматтың бауырын іздеуге қылмыстық-атқару жүйесінің қызметкерлері көмектескен деп хабарлайды Хабар 24 телеарнасы.
Анатолий мен Евгения Алға қаласындағы балалар үйінде тәрбиеленген. Ата-аналық құқығынан айырылған әкелері естерінде жоқ. Аналары өмірден ерте озып кеткен екен. Анатолийді 7-8 жасында басқа интернатқа ауыстырып, қарындасынан көз жазып қалады. Ер жеткеннен кейін қарындасын іздеуді бастаған.
Алайда жаза басып, қылмыс жасаған ол темір тордың ар жағынан бір-ақ шығады. Ұрлықпен ұсталған жігіт 2 айдан бері жазасын өтеп жатыр екен.
«Өте қуаныштымын. Арада 15-16 жыл өтіпті. Ендігі арманым түрмеден шыққан соң, жұмыс істеп, отбасын құру. Қарындасымды қасыма алып, қамқор болғым келеді. Оған менің қолдауым қажет», - дейді 23 жастағы жігіт.
Ал 18 жастағы Евгения жастардың «Мейірім» әлеуметтік үйінде тұрып жатыр. Бұрын патронаттық отбасында тәрбиеленген ару ағасынан алыстағанда небәрі 2 жаста болған.
«Мен енді ағама келіп тұрамын. Себебі оның менен басқа ешкімі жоқ. Барынша қолдау көрсетемін. Жазасын өтеп шыққанан кейін дұрыс жолмен жүргенін қалаймын», - деп ағынан жарылды Евгения Бацынюк.
