Қарағанды тұрғынынан қоңырау түсті: ол әкімдік пен сауда үйін жарып жібермек болды

Қарағанды қаласындағы барлық жедел қызметтерді дүрліктірген 39 жасар азамат ұсталды. Ол облыс орталығындағы сауда үйлерінің бірінде жарылыс ұйымдастырамын деп қорқытқан, деп хабарлайды ҚазАқпарат. 

11 тамыз күні сағат 12.13 шамасында "102" телефонына белгісіз азамат хабарласып, қаладағы «City mall» сауда үйін жарып жіберемін деп қорқытқан. 

Облыстық Полиция департаментінің жедел кезекшісімен оқиға орынына барлық жедел қызметтер жұмылдырылды. Патрульдік полиция полкінің қызметкерлерімен оқиға орыны қоршауға алынып, ғимараттан 240 адам сыртқа шығарылды. Бір сағат өткеннен кейін, белгісіз азамат "102" телефонына қайта қоңырау шалып, облыстық әкімдіктің ғимаратына жарылғыш зат қойғаны туралы хабарлады. 

«Полиция қызметкерлерімен жедел-іздестіру іс-шаралары барысында «ізін суытпай» аталған іске қатысы бар деген күдікпен 39 жастағы қала тұрғыны ұсталып, одан қоңырау шалған телефон тәркіленіп алынды. Сондай-ақ, полиция қызметкерлерімен екі ғимарат та тексеріліп, жарылғыш зат анықталған жоқ», - деп хабарлады Қарағанды облыстық ПД баспасөз қызметі. 

Қазіргі уақытта ұсталған азаматқа қатысты ҚР Қылмыстық Кодексінің 273- бабына сәйкес сотқа дейінгі тергеу амалдары басталып, тергеу жүргізілуде.