Ерлан Айтахановтың төрағалығымен туризмді дамыту жайына арналған мәжіліс өтті

Шымкент қаласының әкімі Ерлан Айтахановтың төрағалығымен туризмді дамыту жайына арналған мәжіліс өтті. Жиында Шымкент қаласы туризм баскармасы тарапынан атқарылып отырған жұмыстардың есебі мен 2020 жылға арналған жоспары және аталған саланы дамыту бойынша бірқатар жаңа жобалар талқыланды, деп хабарлайды Skifnews.kz ақпарат порталы.

Бүгінде аймақтық экономиканың қозғаушы күшін қалыптастыруда салмақты компоненттердің бірі – ішкі және сыртқы туризм екенін айтқан қала басшысы Еуропаның дамыған елдерінің біразы осы мүмкіндікті өз пайдасына жаратып жатқанын айтты.

«Еліміздің үшінші мегаполисінде туристік кластерді дамытуға мүмкіндік мол. Ел ішіндегі және шетелдік туристтер үшін аймақтың тартымдылығын арттыруға мәдени және тарихи ескерткіштеріміз де жетерлік.  Климатымыз өте қолайлы. Түркістан облысындағы негізгі туристік орындар бір-бірімен өзара байланыста болып, Шымкент арқылы  Сарыағаш, Түркістан, Отырар, Қазығұрт пен Самарқандқа және Бұхараға жалғасатын Ұлы Жібек жолы бойындағы көне қала туристік дәлізін қалыптастыруымыз керек. Яғни, жылы өлке Оңтүстікке келген туристтердің саяхаты Шымкент қаласынан басталуы тиіс. Сондықтан да қалада бірнеше жерден ақпараттық дүңгіршектер орнатып, туристтік нысандарға қойылып жатқан QR паспортты орнатуды аяқтау қажет. Біз ұлттық құндылықтарымызды сақтай отырып, оны дұрыс пайдалана алуымыз да қажет. Қонақжай туризмін дамытсақ үлкен жетістіктерге жетеміз деп сенемін» - деді Ерлан Қуанышұлы.

Бұдан басқа әкім туризмді дамыту үшін ең алдымен қонақ үйлер мен туристтік агенттіктермен жұмысты жандандырып, сервистік қызметті жақсартуды оның ішінде әжетхана мәселесін шешуді нақты тапсырды.
Жиынға қатысқан туристік ассоциациясы мен туризм бизнесіне қатысты кәсіпкерлер және «KAZAKH INVEST» компаниясының өкілдері, Кәсіпкерлер палатасының мүшелері Шымкент қаласының туризм саласын дамыту бойынша өз ойларымен бөлісіп, ұсыныстарын жеткізді.

Сөз соңында шаһар басшысы «Шымкент – қайырымды қала» деген баламаға лайықты болып, қала тұрғындары кездейсоқ кездесіп қалған отандық немесе шетелдік қонақтарға жол сілтеп, ізеттілігімен, мейірімділігін көрсетсе, ол да туризмді дамытуға өз септігін тигізетінін айтып, жиынды қорытындылады.