Латын әліпбиін оқыту кейінге қалдырылды

2020 жылдан бастап енгізу жоспарланған қазақстандық мектептерде латын әліпбиін оқыту кейінге қалдырылған. Өйткені, жаңа әліпби әлі бекітілмеген. Бұл туралы Білім және ғылым министрі Асхат Аймағамбетов хабарлады, дейді 7kun.kz.

«Мәдениет және спорт министрлігіне (латын әліпбиін) аяқтау туралы нұсқау берілді. Оны аяқтағаннан кейін, емле ережелері мен әліпби бекітілгеннен кейін, біз тиісті жұмыстарды жүргізетін боламыз. Әзірше 2020 жылы мектептерде латын әліпбиін оқуды бастаймыз деп айтудың қажеті жоқ. Өйткені, бұл - ұзақ процесс. Алдымен ережені бекіту керек. Содан кейін ереже болады, одан кейін «пилот», одан кейін тиісті дайындықты жүргізу керек. Содан соң ғана оқу-әдістемелік құралдар шығады», — деді Асхат Аймағамбетов, Сенат отырысында.

Еске сала кетсек, 2019 жылы 21 қазанда Қасым-Жомарт Тоқаев Мәдениет және спорт министрі Ақтоты Райымқұловаға латын әліпбиін жетілдіруді тапсырған еді.

«Латын графикасына көшу туралы тарихи шешім екі жыл бұрын қабылданды. Алайда, алфавитте әлі де кемшіліктер бар. Тіл мамандары әліпбиді жетілдіруі қажет», — деп жазды Twitter-де президент.