«Дүрліктірушілер мен арандатушылар – біздің дұшпанымыз» - Дариға Назарбаева

ҚР Парламенті Сенатының Төрағасы  Дариға Назарбаева  мемлекет басшысы  Қ.К.Тоқаев енгізген төтенше жағдай - "уақтылы және қажетті шара" деп атады. Оған қоса, біздің ортақ мақсатымыз – коронавирус инфекциясының таралуымен күресу, оның Қазақстан экономикасына және адамдардың өміріне теріс ықпал етуінің алдын алу екендігін ескертті, деп хабарлайды Skifnews.kz ақпарат порталы, Сенаттың баспасөз қызметіне сілтеме жасап. 

"Барлық мемлекеттік қызметтер, әкімдіктер азаматтардың қауіпсіздігін қамтамасыз етуге және халықты барлық қажетті заттармен үздіксіз қамтамасыз ету мәселесін шешуге жұмылдырылған.

Қазіргі уақытта медицина қызметкерлеріне барынша көмек пен қолдау көрсету қажет – олар осы аурумен күрестің алдыңғы қатарында, адамдардың өмірі мен денсаулығы олардың кәсібилігі мен жауапкершілігіне байланысты.

Біз құқық қорғау органдарының әрекеттеріне және төтенше жағдайлар кезіндегі азаматтардың тәртібі мен қауіпсіздігін қамтамасыз ету қажеттілігіне  байланысты шектеулерге түсіністікпен қарауымыз керек", - деді Сенат төрағасы.

Сондай-ақ ол, мемлекеттік органдардың міндеті – пандемия және онымен күресу бойынша жүргізіліп жатқан шаралар туралы ақпараттың барынша ашықтығы мен сенімділігін қамтамасыз ету екендігін жеткізді. 

"Үрейлі көңіл күй, қауесет пен жалған ақпарат таратуға үзілді-кесілді тоқтау салу керек. Дүрліктірушілер мен арандатушылар – короновирустың өзі сияқты  біздің дұшпанымыз.

Пандемиямен күресудегі біздің ортақ жетістігіміз, бірінші кезекте, бүкіл қоғамның, еліміздің барлық азаматтарының, біздердің, қазақстандықтардың жауапкершілік ұстанымына байланысты. Тыныштықты, тәртіпті, гигиенаны сақтау, оқшаулану, өзіңізге және жақын адамдарыңызға қамқорлық жасау - вируспен күресудің басты құралы", - деді Д.Назарбаева.

 Бір ескерерлігі, ҚР Парламентінің Сенаты қалыпты режимде жұмыс істейді. Алайда, коронавирустың алдын-алуға байланысты, депутаттардың негізгі жұмысы комитеттерде топтастырылатын болады. Сенаторлар заң жобаларымен жұмыс жасайды және парламенттік тыңдауларға материалдар жинайды.