Алматыда ақша жымқырған бір ауданның экс-әкімі 40 млн-нан астам айыппұл арқалады (ВИДЕО)

Алматыда Алатау ауданының экс-әкімі Шахмерден Рыспаев пен оның орынбасары Саят Ағыбаевқа қатысты сот үкімі шықты, деп хабарлайды Tengrinews.kz.

Соттың үкімімен Рыспаев айыпты деп танылып, 40 406 250 теңге айыппұл төлеуге міндеттелді.

"Шахмерден Рыспаев ҚР Қылмыстық кодексінің 189-бабының 3-бөлігінің 1,2-тармақтары бойынша айыпты деп танылып, ұрланған мүлік үшін 41 628 570 теңге айыппұл төлеуге міндеттелді. ҚР Қылмыстық кодексінің 62-бабының 3-бөлігіне сәйкес, 17.01.2020-06.05.2020 аралығында қамауда болғанын ескере отырып, 40 406 250 теңге айыппұл салу міндеттелді. Сондай-ақ, өмір бойына мемлекеттік қызметте жұмыс істеу құқығынан айыру туралы шешім қабылданды", - делінген үкімде.

Экс-әкімнің бұрынғы орынбасары Саят Ағыбаев 2 жылға бас бостандығынан айырылды.

"Саят Ағыбаев ҚР Қылмыстық 366-бабы, 369-бабының 1-бөлігі, 189-баптың 1-бөлігі бойынша айыпты деп танылып, ҚР Қылмыстық кодексінің 366-бабының 1-бөлігіне сәйкес 2 500 000 теңге айыппұл төлеуге міндеттелді, ҚР Қылмыстық кодексінің 369-бабының 1-бөлігі бойынша 1 жылға, 189-баптың 3-бөлігі 1,2 тармақтары бойынша екі жылға бас бостандығынан айырылды", - делінген соттың үкімінде.

Ағыбаев та өмір бойына мемлекеттік қызметте жұмыс істеу құқығынан айырылды.