$ 474.72 € 515.17 ₽ 5.58
Астрахань облысында тұратын Танзиля Бисембеева Гиннестің рекордтар кітабына планетадағы ең қарт тұрғын ретінде еніп отыр. Ағымдағы жылдың 14 наурызында әжей 120-ға толыпты. Бұл жайында "Российская газета" басылымы хабарлап отыр.
Танзиля әжей қазақтар қоныстанған Исламғазы ауылында тұрады. Ол дүниеге 1896 жылы патшалы Ресей кезеңінде келген. Үш баласы, он немересі, 24 шөбере және 2 шөпшегі бар.
"Ғасырдан астам ғұмырында анамыздың көрмегені жоқ. Распутиннен Путинге дейінгі заманды көзбен көрген. Өмір бойы егін даласында еңбек еткен", - дейді қарияның ұлы Шынтас Бисембеев.
Танзиля апаның бірінші күйеуі Ұлы Отан соғысында қаза тапқан. Одан туған перзенті шақалақ кезінде шетінеп кетіпті. Ал, екінші күйеуінен 53, 54 және 57 жасында үш бала босанған. Үш ұлы да қазір зейнеткер, барлығы анасымен көрші тұрады. Олардың айтуынша, әжейдің өмірге деген сүйіспеншілігі, адамдарға деген махаббаты ұзақ жасауына себеп болған.
Таң қаларлығы, Танзиля апа жүзге келгенше дәрігерлердің көмегіне жүгінбепті. Тіпті, үш баласын да үйінде босанған. Ал, жүзден асқан соң ең алдымен көзі сыр беріпті. Дәрігерлер араласып, операция да жасаған.
Қазір әжей кіші ұлы мен келінінің қолында. Далаға көп шықпаса да өзі жүріп-тұрады. Төрткүл дүниеде болып жатқан жаңалықтарды қалт жібермей көріп отырады.
