Сағынтаев алматылықтарға ескерту жасады

Бақытжан Сағынтаев Алматы қаласына кіретіндерге және шығатындарға шектеу қойылуы мүмкін екенін айтты, деп хабарлайды Stan.kz.

Мегополис басшысы "Алматы" арнасының Akimat LIVE тікелей эфиринде қалаға блокпостар қойылуы мүмкін екенін мәлім етті.

"Алматының жабылатыны немесе жабылмайтыны өзімізге байланысты. Егер де сақтық шараларын сақтамасақ, маска тақпасақ, ара қашықты сақтамасақ, той тойлап жүретін болсақ, амал жоқ сол жағдайға келуіміз мүмкін. Сондықтан санитарлық талапты қатаң сақтау қажет", - деді Бақытжан Сағынтаев.

Әкімінің айтуынша, облыс тұрғындарының басым бөлігі Алматы қаласында жұмыс істейді.

"Біз Алматы маңындағы аудандардан бөлектене алмаймыз. Себебі, көп адам сол облыстан қатынап жұмыс істейді. Бұл тек шағын кәсіпорындар да ғана емес мемлекеттік қызметте жұмыс істеп жатқандар да бар. Қайталап айтамын, талапты сақтайық. Әйтпесе, амал жоқ блокпост қоюға тура келеді", - деді әкім.

Естеріңізге сала кетейік, бұған дейін Сағынтаев Алматыдағы коронавирус жұқтырғандар туралы "Бір аяғымыз "қызыл" аймақта" деп хабарлаған.