Қарағандыда ауданаралық экономикалық соттың судьясы ұсталды

Қарағандыда облыстық мамандандырылған ауданаралық экономикалық сотының судьясы Ержан Ғабдуллинге қатысты сот процесі жүріп жатыр. Оған алаяқтық жасады және 8 миллион теңге пара беруге итермеледі деген айып тағылып отыр. Бұл ақша басқа судьяға сыйақы ретінде берілуі керек болған, деп хабарлайды Аzattyq-ruhy.kz порталы.

Бұл іс Қарағандыдағы 108 пәтерлік екі тұрғын үйдің құрылысымен байланысты. 2020 жылы мемлекеттік сатып алу мердігердің таңдауы бойынша өтті, оның жеңімпазы болған Жаңаөзен қаласының компаниясы - «Жақ-Жал» ЖШС. Ал, тендерге қатысқан «Оливия» Қарағанды ​​құрылыс компаниясы тізімнен тыс қалған. Осылайша, мемлекеттік сатып алудың нәтижелерімен келіспеген жергілікті компания өкілдері Қарағанды ​​облысының мамандандырылған экономикалық сотына екі талап арызбен жүгінді. Кейін талап арыздар бір іске біріктіріліп, судья Ербол Майпасовқа берілді.

Мемлекеттік айыптаушының хабарлауынша, «Оливия» ЖШС заңгері Елена Кантер-Скрипкина мен Қарағанды облыстық мамандандырылған ауданаралық экономикалық сотының судьясы Ержан Ғабдуллин 1999 жылдан бері таныс болған. Ержан Ғабдуллин құрылыс компаниясының заңгеріне 8 миллион теңге ақы төлесе, бұл іске көмектесе алатынын айтқан. Екі тарап та бұл жағдай бойынша заң бұзып отырғанын түсінген. Сол себепті, олар әңгімелесу және телефонда хат алмасу барысында параны «анализ» деген сөз деп атаған.

«2021 жылдың 5 ақпанында судья Елена Кантер-Скрипкинаға танысын жіберіп, ақшаны алмақ болған. Сол күні компания заңгері делдалмен «Оливия» ЖШС кеңсесі жанында жолығып, 10 мың еуро мен 3 млн теңге ақша салынған пакетті берген. Сосын делдал ақша салынған пакетті судьяның әйеліне апарып берген. Судья ақшаны өз қалауы бойынша жаратпақ болған. Кейінірек Сыбайлас жемқорлыққа қарсы қызмет Ержан Ғабдуллиннің пәтерінде тексеру жүргізіп, 10 мың еуро мен 3 млн теңге ақшаны тапты», - дейді прокурор.

Антикор өкілдері судья Ержан Ғабдуллинді 6 ақпанда ұстаған, қазір ол қамауда отыр. Алайда, ол өзіне тағылған жемқорлық қылмысын мойындамайтынын айтқан. Ал, компания заңгері (пара беруші) Елена Кантер-Скрипкина өзіне тағылған айыпты жоққа шығармады және істеген әрекеті үшін өкінетінін мәлімдеді.

Бұл істі қарау Қарағанды ​​қаласындағы Қазыбек би аудандық сотында жалғасып жатыр.