Қарағанды облысында ауыл тұрғындары танымайтын үміткер әкім болды

Қарағанды облысы Дәрия кентінің тұрғындары өңірде таяуда сайланған жаңа әкім Тілеухор Базыловқа қарсы шықты. Олардың айтуынша, тұрғындар басқа үміткерге дауыс берген, деп хабарлайды Tengrinews.kz.  

Кент тұрғындары таяуда өткен сайлау қорытындысымен келіспейді. Олар сайланған әкімнің кім екенін және оған кімдер дауыс бергенін білмейміз, дейді. 

Жоба мәліметіне сүйенсек, нәтижені естіген тұрғындар сайлау учаскесінің алдына жиналып, комиссиядан түсініктеме талап еткен. Ауылда дауыс беру құқығы бар 306 азамат тіркелген. Оның 206-сы бес кандидат арасында таңдау жасаған. Ауыл тұрғындары өз арасынан шыққан кандидатқа жаппай дауыс бердік десе те, оның есебінде 73 дауыс, ал жеңіске жеткен Тілеухор Базылов 90 дауысқа ие болыпты. Қалған 43 дауысты 3 кандидат өзара бөліп алған. 

"Әрбіріміз өз даусымызды бердік. Ал енді шешімі жеткенде сырттан келген біреу тоқсан дауыс алып отыр. Негізі оған Дәрия халқы, ешкім даусын бермеген. Сонда енді бұл қалай болып тұр? Мазақ қылғаны ма?" - дейді Дәрия кентінің тұрғыны Ералы Күзембаев. 

Ал аудандық сайлау комиссиясының төрағасы халықтың наразылығы туралы естімегенін айтты.

"Әділ я әділ емесін айта алмаймын. Бірінші білейік, мен халық наразы болып жатыр дегенді естіген жоқпын", - деді Шет аудандық сайлау комиссиясының төрағасы Ержан Мұқабаев. 

Тұрғындар жеңіске жеткен Базыловты жеке танымайтынын, бірақ Шет ауданында жауапты қызмет атқаратынын айтқан. Бұл ақпаратты Шет ауданының әкімі Мұхит Мұхтаров растады. Ол халықтан жаңа әкімге 3 ай мерзім беруін сұрапты.

"Егер қолынан іс келмейтін болса, жұмысты атқара алмайтын болса, осы мерзім ішінде белгілі болады. Жұмыс істеуге мүмкіндік берейік. Егер жұмыс істей алмайтындай жағдай болса, алып тастаймыз деген уәде болды", - деді Мұхит Мұхтаров.

Журналистер Қарағанды облысының сайлау коммиссиясына хабарласқан, бірақ жауап ала алмапты. Енді Дәрия кентінің жұрты сайлаудың ресми қортындысын күтіп, халық қалаған кандидатын соңына дейін қолдаймыз деп отыр.