«Жылда бір оқушы жүкті болады»: Қызылорда тұрғындары жасөспірім қыздардың ерте тұрмысқа шығуына алаңдаулы

Қызылорда тұрғындары жасөспірім қыздардың мектеп қабырғасында жүріп аяғы ауыр болып қалғандықтан, ерте тұмысқа шығатынына наразылық білдірді, деп хабарлайды Stan.kz ақпарат агенттігі. Бұл туралы қоғам белсендісі Сандуғаш Шымболатқызы Facebook-тегі парақшасында жариялады. Оған бір топ ата-ана мектептегі жағдайды айтып хат жазған.

Онда тұрғындар Шиелі ауданы Жөлек ауылының №152 мектебі туралы баяндапты. Олардың айтуынша, бұл ауылда үш жылдан бері жылына бір оқушы қыз мектепте оқып жүріп тұрмысқа шыққан.

«Биыл 12 шілдеде 10-сынып оқушысы Жахаев ауылына күйеуге шықты. Тағы да жақында 10-сыныптың бір оқушысы жүкті болып, тұрмысқа шықты. Сонда мектеп «загс» орны ма?», – делінген хатта.

Сондай-ақ ата-аналар баланы аманаттап мектепке бергеннен кейін дұрыс тәрбиелеу керектігін айтыпты.

«Тізгінсіз кеткен балалардың саны ауылда еселеп артқанын қаламаймыз. Тоқтау бола ма? Жоқ па? Ата-ана ма әлде мектеп пе, кім жауапты анықтап беріңдер? Жауапты органдар ешқандай шара қолданбай, жасырып отыр», – деп те жазылған хатта.

Экспресс К басылымына Қызылорда облыстық білім басқармасы аталған жағдайға байланысты пікір білдірді.

«Бұл мәселе бақылауымызда. Тиісті шаралар қабылдануда», – деген облыстық білім басқармасының басшысы Ақзира Қасымова.