Конструкция құлап кеткен елорда тұрғыны 10 күннен бері реанимацияда жатыр

Нұр-Сұлтанда конструкция құлап зардап шеккен әйел 10 күннен аса уақыт ауыр халде жатыр, - деп хабарлайды Tengrinews.kz.

"Науқастың жағдайы әлі де ауыр, дәрігелердің бақылауында болады, реанимацияда жатыр. Дәрігерлер ешқандай болжам жасай алмайды. Әйел ауруханаға бас жарақатымен өте ауыр жағдайда түсті. Бірден медициналық көмек көрсетіліп, шұғыл ота жасалды", - деп хабарлады Нұр-Сұлтан қаласының қоғамдық денсаулық сақтау басқармасының баспасөз қызметі.

22 қазанда Сығанақ көшесіндегі "Номад" ТК ғимаратындағы сауда үйінің кіреберісінде әйелге конструкция құлаған.

Полиция Қылмыстық кодекстің 306-бабы "Қауіпсіздік талаптарына сай келмейтін тауарларды шығару немесе сату, жұмыстарды орындау не қызметтерді көрсету" бойынша сотқа дейінгі тергеуді бастаған еді.

BI Group баспасөз қызметі бизнес-орталықтың шатырын жалға алатын компанияның құрылыс холдингіне қатысы жоқ деп мәлімдеген.