Жаңалықтар 21.11.2021 сағат 20:54

Елордадағы «Нұр Астана» мешітінің атауы өзгертілді

15 жылдық тарихы бар мешіт ендігі таңда ойшыл, ғұлама әл-Фарабидің есімімен аталатын болады.
Елордадағы «Нұр Астана» мешітінің атауы өзгертілді
Фото: ашық дереккөз
Бөлісу
Бөлісу
Бөлісу

Бас мүфти Наурызбай қажы Тағанұлының төрағалығымен өткен Қазақстан мұсылмандары діни басқармасының Төралқа мәжілісінде "Нұр Астана" мешітінің атауын өзгерту жөніндегі Ғұламалар кеңесінен ұсыныс түсті.

ҚМДБ бөлім басшылары, облыс имамдары мен Орталық аппарат қызметкерлері мешіт атауының өзгеруін қолдап, дауыс берді. Нәтижесінде 15 жылдық тарихы бар мешіт ендігі таңда ойшыл, ғұлама әл-Фарабидің есімімен аталатыны туралы шешім қабылданды.

"Жақында ҚМДБ-да ғұламалар кеңесінің ұсынысымен елордамызға талай жылдар қызмет еткен Нұр-Астана мешітінің атауын Әл Фараби бабамыздың атына өзгерту жайында ұсыныс берілген болатын. Аллаға сансыз шүкірлер болсын! Әбу Насыр Әл Фараби бабамыздың атына өзгерту жайында шешім қабылданды. Жалпы осы елорда төріндегі мешітке бабамыздың аты берілуі тектен тек емес. Өйткені, ең бірінші Әл Фараби деген кезде әрбір мұсылман үшін, әрбір қазақ руханиятына имандылықты, білімге деген құштарлықты, қанағатшылықты, қарапайымдылықты еске түсіреді", – деді Нұр-Сұлтан қаласының Бас имамы Ерболат Жүсіпов.

Тәуелсіздіктің 30 жылдығына орай қабылданған шешім нәтижесінде бүгін ресми түрде бұрынғы мешіт атауы жазылған тақтайша алынып, орнына Әбу Насыр әл-Фараби атындағы жаңа мешіт атауымен тақтайша орнатылды.

"Мешітке әл-Фарабидың есімін бергенде біз екі себеппен қуандық. Бірінші — ғылым, білім келеді, әл-Фарабидың аты бізді жаңғыртып тұрады деп. Екінші жағдай, біз енді әл-Фараби атымен әлемге таныламыз, әлемді танимыз деп. Әл-Фараби біз үшін рухани көпір", – дейді Л.Н. Гумилев атындағы ЕҰУ проректоры, филология ғылымдарының докторы Дихан Қамзабекұлы.

Айта кетейік, 2005 жылдың 2 наурызында ашылған мешіт елорданың Есіл ауданында орналасқан.

Мешіт Катар мемлекетінің Әмірі шейх Хамад бин Халифа әл-Сәнидың қайтарымсыз сый ретінде бөлген қаржысына тұрғызылған болатын. Орталықтың ашылуына сол тұстағы мемлекет басшысы Нұрсұлтан Назарбаев қатысып, Қағба мен Құран бейнеленген, сүрелер түсірілген жапқышты сыйға тартты.

Ол "Әзірет Сұлтан" мешіті ашылғанға дейін Қазақстан мен Орталық Азиядағы ең үлкен мешіт болды.

Мешіттің жалпы ауданы – 3 930 шаршы метр, ал негізгі күмбездің биіктігі – 43 метр. Сондай-ақ биіктігі 62 метр болатын төрт мұнарасы бар. Мешітке 5000 адам сыяды.

Әл-Фараби – философ, математик, Шығыс ғалымы. Ол ортағасырлық шығыс философиясының ірі өкілдерінің бірі.

Оның еңбектері Ибн Сина, Ибн Баджа, Ибн Туфайл, Ибн Рушдқа, сондай-ақ ортағасырлық Батыс Еуропаның философиясы мен ғылымына әсер етті.

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар